ქართული ღვინო ირლანდიაში

რამდენიმე დღის წინ The Irish Times–ში ჯონ უილსონის სტატია გამოქვეყნდა, რომელიც ქართულ ღვინოს მიეძღვნა. სტატიაში ქართული ღვინის შესახებ კარგად ნაცნობ ლეგენდებსაც ამოიკითხავთ და რეალურ ამბებსაც ნახავთ. კარგია, რომ ავტორი თამამად საუბრობს საქართველოს, როგორც ღვინის აკვნის სტატუსზე და არც 8000 მოსავლის სლოგანი ავიწყდება. დიდი ყურადღება ეთმობა ქვევრის თემასაც, სადაც ავტორი ამბობს, რომ წითელი ქვევრის ღვინოები შეიძლება მაინცდამაინც განსხვავებული არ იყოს კლასიკური წითელი ღვინოებისგან, მაგრამ თეთრი ქვევრის ღვინოები შოკისმომგვრელ განსხვავებას გვთავაზობსო და იქვე დასძენს, ღვინის ისეთ დედაქალაქებში, როგორიც ლონდონი და ნიუ იორკია, ამ ღვინოების ნამდვილი ბუმიაო.

სასიამოვნოა, რომ ავტორი ნარინჯისფერი ღვინის ცნებას (Orange Wine) იქვე ქარვისფერით აზუსტებს (Amber Wine) და ახალბედებს ამ ორი ღვინის სანიმუშო ჯიშებად საფერავს და რქაწითელს უსახელებს.

ბოლოს ავტორი რამდენიმე ხელმისაწვდომ ქართულ ღვინოს ახასიათებს: თბილღვინოს საფერავს (2014), შავკაპიტო, ხოხბის ცრემლები (2014), ციცქა, ნიკოლაძეების მარანი (2014) და თბილღვინოს ქვევრის რქაწითელი (2014).

© საქართველოს ღვინის კლუბი, ღვინის ეროვნული სააგენტო, ღვინის საინფორმაციო ცენტრი