მცირე მარნები ახალი ღვინის ფესტივალზე

სადეგუსტაციო ნიმუშების მიღება გრძელდება 11 აპრილის ჩათვლით. „ღვინის კლუბი“ მცირე მარნების ღვინოებს მოუთმენლად ველით.

10 მაისს მთაწმინდაზე „ახალი ღვინის ფესტივალი“ გაიმართება – ერთ-ერთი ყველაზე გამორჩეული ღონისძიება ქართული ღვინის სამყაროში. ფესტივალი, რომელიც 2010 წლიდან ტარდება, ყოველწლიურად უფრო მასშტაბური და მრავალფეროვანი ხდება. აქ შეხვდებით როგორც ცნობილ დიდ კომპანიებს, ასევე მცირე საოჯახო მარნებს, რომლებიც ქართული ღვინის სახეს ქმნიან.

 ფესტივალის შესახებ მარანი „კასრელის“ მეღვინე, მიშა დოლიძე გვესაუბრა: „ზოგადი ჭეშმარიტებაა, რომ თუ სახლში დაჯდები და არავის არაფერს არ გაასინჯებ, ცნობადობა ასე თავისთავად არ მოვა. რეალურად ახალი ღვინის ფესტივალი არის ყველაზე დიდი ღონისძიება რეგიონში შესაბამისად ძალიან მნიშვნელოვანია ჩვენთვის, მეღვინეებისთვის, ხშირად ყოფილა ფესტივალიდან ორჯერადი გაყიდვები ფესტივალის მეშვეობითაც. თუმცა გაყიდვებიც და ყველა ეს დეტალი ღვინის შემთხვევაში დამოკიდებულია ორ საკითხზე: ეს არის ღვინის ხარისხი, რაც ყველაზე მთავარია და მეორე, ეს არის სოციალიზაცია, ერთგვარი „ნეთვორქინგი“, ამ ორ რაღაცაში კი ეს ფესტივალი ძალიან მნიშვნელოვან როლს ასრულებს. ასოცირებული მიდგომა ღვინის წარმოების კუთხით არ არის იმდენად განვითარებული საქართველოში, რეალურად დღეს ერთადერთი ადგილი სადაც მეღვინეები ღიმილით, სიყვარულით და სიხარულით ერთმანეთის ღვინოებს სინჯავენ და მერე უკვე ამ გემოებს, სისუფთავეს, ზადებს თავის საკუთარ წარმოებას ადარებენ, რეალურად არის სწორედ „ახალი ღვინის ფესტივალი“. ყველაზე ღია და მართლაც თავისუფალი სივრცე, სადაც არ ეშინიათ მეღვინეებს და თავს უსაფრთხოდ გრძნობენ. დავდივართ ამ ფესტივალზე, ჩვენს ღვინოს ვასინჯებთ სხვებს, ჩვენ ვსინჯავთ სხვის ღვინოებს და ეს გვეხმარება ყველაზე მთავარში - ღვინის ხარისხის გაუმჯობესებაში. ამაზე ღია, უსაფრთხო და კარგი პლატფორმა საქართველოში არ არსებობს. შემდეგია სოციალიზაცია: გაცილებით მეტი კოლეგა გავიცანი მე ახალი ღვინის ფესტივალზე, ვიდრე სხვაგან. მეღვინეები ასე თუ ისე ჩაკეტილი ადამიანები არიან. ცოდნის გაზიარება, ერთმანეთის გაცნობა და მერე ერთმანეთთან კავშირის დამყარება, მეგობრობა, კოლეგიალურობა -  აი ეს, ჩემი აზრით, ყველაზე აქტიურად სწორედ ახალი ღვინის ფესტივალზე ხდება“.

მცირე მარნებისთვის ფესტივალი მხოლოდ საკუთარი ღვინის წარდგენა კი არა, გაცილებით მეტი რამაა – ეს არის ადგილი, სადაც მეღვინეები ერთმანეთს არა კონკურენტებად, არამედ თანამებრძოლებად და თანამოაზრეებად აღიქვამენ. ისინი იზიარებენ გამოცდილებას, ცვლიან იდეებს, ეცნობიან ახალი ღვინის ტენდენციებს და მუშაობენ იმაზე, რომ მცირე მარნების ხმა უფრო მკაფიოდ ისმოდეს ქართულ და საერთაშორისო ღვინის ბაზარზე: „პირველად ჩვენი ღვინო ხალხს სწორედ ახალი ღვინის ფესტივალზე გავაცანით. ფესტივალი ყველაფერ დადებითთან ასოცირდება: მომხმარებლების გაცნობა, ეს ხალისი, ურთიერთობა მეღვინეებს შორის. ღვინო ხალხს, ხალხი კი ღვინოს იცნობს. ჩვენს პროდუქციასთან ერთად ადამიანებს ვეცნობით, მათთან უშუალო კომუნიკაცია და მომხმარებლებთან საუბარი ძალიან საინტერესო და ყველაზე კარგი დეტალია ფესტივალისა“ - გვიამბობენ „ღვინო მოსულადან“.

ახალი ღვინის ფესტივალი წინა მოსავლის ერთგვარი პრეზენტაციაა. მეღვინეები აქ გულწრფელ შეფასებებს იღებენ  როგორც პროფესიონალებისგან, ისე უბრალო სტუმრებისგან. ფესტივალზე მეღვინეები პირადად ესაუბრებიან ღვინის მოყვარულებს, აცნობენ მათ საკუთარ მეღვინეობას, ღვინის მახასიათებლებს, გემურ თვისებებსა და ვაზის ჯიშებს, მარანი "ნიკიფორედან" აღნიშნავენ, რომ :„ახალი ღვინის ფესტივალი“ გაზაფხულთან, სიხალისესთან, სიახლეებთან, ახლის აღმოჩენასთან არის სულ კავშირში, ჩემთვის ეს ფესტივალი დღესასწაულია. ეს ფესტივალი არის ერთ-ერთი ყველაზე კარგი, დახვეწილი, მხიარული ამბავი. ახალ მცირე მარნებს ვურჩევ, რომ აუცილებლად მიიღონ მონაწილეობა „ახალი ღვინის ფესტივალზე“ პირველ რიგში იმიტომ, რომ ძალიან მასშტაბურია, ძალიან საინტერესო ხალხი მოძრაობს, ბევრ სიახლეებს მიიღებენ და ისწავლიან ბევრს“.

ხშირად აქ იბადება ახალი თანამშრომლობები, ხდება საერთო პროექტებზე შეთანხმება და მცირე მარნები უფრო მჭიდროდ ერთიანდებიან, რათა ერთობლივად გაძლიერდნენ ბაზარზე. მცირე მარნებისთვის დიდი მნიშვნელობა აქვს იმასაც, რომ ფესტივალს არაერთი უცხოელი სტუმარი ესწრება, რომლებიც ქართულ ღვინოზე მუშაობენ – ღვინის იმპორტიორები, სომელიეები, ჟურნალისტები და კრიტიკოსები. მათი მხრიდან ინტერესი შესაძლოა ახალი ბაზრებისკენ გახსნილი კარი გახდეს მცირე მარნებისთვის.

10 მაისს „ახალი ღვინის ფესტივალი 2025“ მთაწმინდის პარკში გაიმართება. ფესტივალის სპონსორია საქართველოს გარემოს დაცვისა და სოფლის მეურნეობის სამინისტრო და სსიპ ღვინის ეროვნული სააგენტო, საინფორმაციო მხარდაჭერას უზრუნველყოფს საიტი „მარანი“ (vinoge.com), ღვინის საინფორმაციო ცენტრი. ღონისძიების პარტნიორია მთაწმინდის პარკი, ღვინის მაღაზიათა ქსელი “8000 მოსავალი“, ფესტივალის ორგანიზატორია საქართველოს ღვინის კლუბი.

© ღვინის კლუბი/vinoge.com