უკრაინაში რუსეთის მიერ ომის დაწყებიდან ერთ თვეზე მეტი გავიდა. რუსეთისთვის დაწესებული ეკონომიკური სანქციები დღითიდღე იზრდება. ეს ალკოჰოლურ სასმელსაც შეეხება, პარალელურად კი კომპანიები რუსულ ბაზარზე ოპერირებაზე უარს ამბობენ. როგორც სახელმწიფოები, ისე კერძო კომპანიები, მათ შორის მეღვინეებიც, უკრაინას სხვადასხვანაირად ეხმარებიან - რუსული პროდუქციის გაყიდვაზე უარის თქმითა თუ ლტოლვილებისთვის თანხის შეგროვების სახით.
კერძო სექტორი უკრაინის მხარდაჭერას განაგრძობს. სხვადასხვა ამერიკულ ბარში ღონისძიებები ეწყობა, რომელთა საშუალებითაც უკრაინელი ხალხის დასახმარებლად თანხა გროვდება. აქტივობების ნაწილი აპრილის დასაწყისშიცაა დაგეგმილი, ერთ-ერთი მაგალითია Keuka Kafe.
მასაჩუსეტსის შტატის ერთ-ერთი ღვინის მაღაზიაც უკრაინელების დასახმარებლად ფულის შეგროვებას იწყებს. მაღაზია, რომელიც ლენოქსში მდებარეობს, ღვინის გაყიდვების ნაწილიდან შემოსულ მთლიანს თანხას World Central Kitchen-ში გადარიცხავს. ეს არის არასამთავრობო საერთაშორისო ორგანიზაცია, რომელიც უკრაინელ ლტოლვილებს განსაკუთრებით აქტიურად ეხმარება. თავად მასაჩუსეტსში მდებარე მაღაზია კი დაინტერესებულ პირებს, რომელთაც უკრაინისთვის დახმარება სურთ, დამატებით ინფორმაციასაც აწვდის.
კერძო სექტორი იაპონიაშიც უკრაინას აქტიურად უჭერს მხარს და მათთვის თანხების მოგროვებას სხვადასხვა საშუალებით ცდილობს. ერთ-ერთი საშუალება ტრადიციული ხელნაკეთი ნივთების გაყიდვებიდან შემოსული თანხაა. საქველმოქმედო ღონისძიებებში განსაკუთრებით აქტიურადაა ჩართული იაპონიაში მცხოვრები უკრაინელი მეღვინე, რომელიც ადგილობრივ მაღაზიებთან ერთად, სხვადასხვა აქტივობას გეგმავს. იგი უკრაინული ღვინის გაყიდვიდან მიღებული შემოსავლის ნაწილს ლტოლვილთა დასახმარებლად რიცხავს, ასევე აპრილში საქველმოქმედო საღამოს მოწყობაა დაგეგმილი.
© ღვინის კლუბი/vinoge.com
ბეჭდვა
თქვენი კომენტარი