ფოტოს წყარო: ირაკლი ღარიბაშვილის ოფიციალური გვერდი facebook-ზე
8 ნოემბერს, ილია ჭავჭავაძის საიუბილეო თარიღთან დაკავშირებით, საგურამოში, ილია ჭავჭავაძის სახლ-მუზეუმის მიმდებარედ, საზეიმოდ გაიხსნა ილია ჭავჭავაძის მარანი. გახსნის ცერემონიას ესწრებოდნენ საქართველოს პრემირი - ირაკლი ღარიბაშვილი, ექს-პრემიერი - ბიძინა ივანიშვილი, სოფლის მეურნეობის მინისტრი - ოთარ დანელია და სხვა ოფიციალურმა პირები.
ისტორიულად მარანი ილია ჭავჭავაძის სიმამრის, თადეოზ გურამიშვილის საკუთრება იყო, რომლის გარდაცვალების შემდეგ აქ ღვინოს თვით ილია აყენებდა. მარნის განახლება ღვინის მწარმოებელი კომპანიის, კახური ტრადიციული მეღვინეობის ინიციატივა იყო, რომელმაც 250 000 ლარის ინვესტიციით უზრუნველყო მარნის კეთილმოწყობა, ინფრასტრუქტურული მოწესრიგება, საცავისა და სადეგუსტაციო დარბაზების ორგანიზება. მარანი ადგილობრივ და უცხოელ ტურისტებს ტურისტულ სერვისებსაც შესთავაზებს.
მარანში იწარმოება კახური ტრადიციული და ევროპული სტილის ღვინოები, როგორც ქვევრებში, ასევე მუხის კასრებსა და უჟანგავი ფოლადის ავზებში. კომპანიას გადაეცა გურამიშვილებისა და ილია ჭავჭავაძის სავენახე მიწის ნაკვეთები, სადაც ქართული ვაზის იშვიათი ჯიშების ვენახი გაშენდა. ვენახები წყალმომარაგების მაღალი ხარისხის სისტემით აღიჭურვა. კახური ტრადიციული მეღვინეობა აცხადებს, რომ ამ ვენახების მთავარი დატვირთვა იქნება ქართული ვაზის იშვიათი ჯიშების აღდგენა და განვითარება.
© საქართველოს ღვინის კლუბი, ღვინის საინფორმაციო ცენტრი
ბეჭდვა
თქვენი კომენტარი