კრისტის სააუქციონო სახლის ნიუ-იურკის მთავარ ფილიალში გაიმართა იშვიათი ღვინოებისა და სპირტიანი სასმელების გაყიდვა. მაგარი სასმელების აუქციონზე გაყიდვა შტატის საკანონმდებლო კრების გადაწყვეტილებით ამა წლის აგვისტოში დაუშვეს. აუქციონის მოწყობა დეკემბრისთვის დაიგეგმა.
წარმატებამ მოსალოდნელს გადააჭარბა.
შოტლანდიური ვისკის, 1926 წლის Macallan-ის ერთი ბოთლი 54 ათას დოლარად გაიყიდა. ეს სასმელი მუხის კასრში ინახებოდა და ბოთლებში 1986 წელს ჩამოასხეს. აუქციონამდე მას 20-30 ათასად აფასებდნენ. სასმელი ნიუ-იურკის მცხოვრებმა შეიძინა, რომელმაც ვინაობა არ დაასახელა.
აუქციონზე ამ სასმელის ფასმა 45 ათასს მიაღწია. მაგრამ მყიდველს 20 %-იანი საკომისიო გადასახადების გადახდაც უწევს და საბოლოოდ თანხა 54 ათას დოლარს მიაღწევს.
6 ათას დოლარად გაიყიდა ვისკი, რომელიც ჯორჯ ვაშინგტონის რეცეპტით დამზადდა არც თუ დიდი ხნის წინათ აშენებულ სპეციალურ საამქროში. რეცეპტი ვაშინგტონის ჩანაწერებში აღმოაჩინეს.
ანონიმურმა კოლექციონერმა 102 ათას დოლარად შეიძინა 729 ბოთლი სკოჩის ნაკრები. სასმელები სხვადასხვა ქარხნებშია დამზადებული, ამ ქარხნებიდან ბევრი აღარც კი არსებობს. ვისკის კოლექცია დაახლოებით 70-100 ათასად იყო შეფასებული.
მოლოდინი ვერ გაამართლა 1811 წლის კონიაკმა Grande Fine Champagne, რომელიც ნაპოლეონის ცოლის, ჟოზეფინას საპატივცემულოდ იწოდებოდა. იგი 4-6 ათას დოლარად იყო შეფასებული და მხოლოდ 3600-ად გაიყიდა.
აუქციონზე 2-3 მილიონ დოლარად გაიყიდა ღვინის კოლექცია. მასში შედიოდა ათასზე მეტი ბოთლი მადერა. კოლექციის ყველაზე ძველი ბოთლი 1749 წლით თარიღდება. ამ კოლექციის შეგროვებას თითქმის 25 წელი დასჭირდა.
© „მარანი“
ბეჭდვა
თქვენი კომენტარი