ჩრდილოური წვნიანი

საჭირო მასალა: 300 გ საქონლის ძვლები, 500 გ დეკეულის რბილი ხორცი, 4-5 ცალი კარტოფილი, 3 თავი ხახვი, 2 ცალი სტაფილო, 80 გ კარაქი, 0,5 ჩ.კ. ხმელი რეჰანი, 0,5 ჭიქა წვრილად დაჭრილი ოხრახუში, მარილი, პილპილის მარცვლები – გემოვნებით.

მომზადება: ძვლებს დავასხათ წყალი და ვხარშოთ, მოვხადოთ ქაფი და განვაგრძოთ ხარშვა. ხორცი დავჭრათ 1,5 სმ სისქის ნაჭრებად, გადავანაწილოთ პატარა ქოთნებში, პირამდე გავავსოთ გადაწურული ძვლების ბულიონით და 25-30 წუთით შევდგათ წინასწარ 200 გრადუსზე გახურებულ ღუმელში. სანამ ხორცი მზადდება, ნახევარწრეებად დავჭრათ ხახვი, წვრილად დავჭრათ სტაფილო და კარაქში მოვშუშოთ. როდესაც ხორცი მზად იქნება, დავუმატოთ მოშუშული ბოსტნეული და პატარა კუბებად დაჭრილი კარტოფილი. ქოთნები 15 წუთით კვლავ ღუმელში დავაბრუნოთ. შემდეგ ჩავუმატოთ პილპილის მარცვლები, რეჰანი, ოხრახუში და მარილი. კერძი ღუმელში კიდევ 10 წუთით დავტოვოთ.

© ღვინის კლუბი/Weekend