გამოქვეყნებულია: 23 დეკემბერი, 2010 - 01:52
22 დეკემბერს "საქართველოს გეოგრაფიული საზოგადოების" დარბაზში "ღვინის კლუბის" მორიგი ლექცია უნიკალურ ქართულ ვაზის ჯიშს უსახელოურს და ამავე დასახელების ღვინოს მიეძღვნა. კომპანია "უსახელაურის ვენახების" მფლობელის, პაატა შარაშენიძის ლექცია: "უსახელოური – ლეგენდა და პერსპექტივები" დეგუსტაციით დასრულდა. "ღვინის კლუბის" წევრებს და სტუმრებს ღვინო ძალიან მოეწონათ და მის განსაკუთრებულ თვისებებზე ლექციის შემდეგაც დიდხანს საუბრობდნენ.
წითელყურძნიანი ვაზის ჯიში - უსახელოური ლეჩხუმის საკუთრებაა. უმაღლესი ხარისხის ბუნებრივად ნახევრადტკბილი ღვინო მიიღება ცაგერის რაიონის სოფლების - ოყურეშის, ზუბის და ისუნდერის ვენახებიდან დაკრეფილი უსახელოურისგან.
კომპანია "უსახელაურის ვენახები" ოყურეშში საერთო ჯამში სხვადასხვა ასაკის 3 ჰექტარ უსახელოურის ვენახს ფლობს. პაატა შარაშენიძის თქმით, ვაზის ეს ჯიში მცირე მოსავლიანობით გამოირჩევა, პირველ სრულყოფილ მოსავალს 7 წლის შემდეგ იძლევა. ვენახები გაშენებულია ისეთ დაფერდებულ ადგილებზე, სადაც ზოგან გლეხები ბაწრებით ჩაბმულები თოხნიან. მთელი ფართობი ბარით და თოხით, ყოველგვარი მექანიზაციის გარეშე მუშავდება. ღვინოსთვის ხელით გადარჩეული ყურძენი იწურება.
დასახელებული ფაქტორების გამო "უსახელაურის ვენახების" ღვინო საკმაოდ ძვირია. ბოლო დრომდე ჰიპერმარკეტ "გუდვილში" იგი 115-120 ლარად იყიდებოდა (კომპანიის ფასი: 70 ლარი). ამჟამად კი 75-80 ლარამდე გაიაფდა (კომპანიის ფასი: 48 ლარი). პაატა შარაშენიძის თქმით, 2010 წლის მოსავლის "უსახელაური" კიდევ გაიაფდება, რაც "უსახელაურის ვენახების" ზვრების მოსავლიანობის გაზრდას უკავშირდება.
© ღვინის კლუბი/vinoge.com
ბეჭდვა
თქვენი კომენტარი