უკრაინელთა გეგმები

Finance.ua-ს მიერ გავრცელებული ინფორმაციით, ღვინისა და ვაზის უკრაინულმა ბიურომ შეიმუშავა უკრაინული მეღვინეობის განვითარების პროგრამა, რომელიც 2020 წლამდეა გათვლილი. ამის შესახებ განცხადება "მეღვინეობის პირველი ეროვნული  ჰოლდინგის" აღმასრულებელმა დირექტორმა - კირილ პრიხნომ გააკეთა. მისივე თქმით, აღნიშნული პროგრამის ავტორი ამავე ჰოლდინგის დირექტორთა საბჭოს თავმჯდომარე, ვალერი შამოტია. როგორც ირკვევა, პროგრამის მთავარი სტრატეგიული მიზანი ათი წლის განმავლობაში უკრაინელების მიერ ღვინის მოხმარების გაზრდაა - წელიწადში ერთ სულ მოსახლეზე 20 ლიტრამდე. ჰოლდინგის აღმასრულებელი დირექტორის განცხადებით, საწყის ეტაპზე მთავარი ამოცანა ნედლეულის პრობლემების მოგვარება იქნება, რა მიზნითაც, პირველ ათწლეულში 98 ჰექტარი ვენახის გაშენება და 40 ჰექტარი ძველი ნარგავების განახლებაა დაგეგმილი. პროგრამის ავტორები ღვინოის წარმოების მოცულობის გაზრდას 2010 წლის 28,2 მილიონი დეკალიტრიდან 2020 წლისთვის 101,7 მილიონ დეკალიტრამდე გეგმავენ.  შესაბამისად, გაიზრდება ექსპორტის წილიც - 2,6%-დან 15%-მდე.