როგორც ცნობილია, სამყაროს მორიგი აღსასრული 2012 წლის 21 დეკემბრისთვის არის ნაწინასწარმეტყველები. იმ შემთხვევაში, თუ ეს წინასწარმეტყველება არ ახდება, გადარჩენის აღნიშვნა უცნაური ლუდით - ,,არმაგედონით”- იქნება შესაძლებელი, რომელიც თავის სახელწოდებას სრულიად ამართლებს. საქმე ისაა, რომ ამ ეგრეთ წოდებული ლუდის სიმაგრე 65 გრადუსს აღწევს. ალკოჰოლის შემცველობით “არმაგედონი” ვისკის, არაყს და სხვა მაგარ სასმელებს უსწრებს, ხოლო ჩვეულებრივ ლუდთან შედარებით 16-ჯერ ძლიერია. უნიკალური სასმლის შემქმნელები ახალგაზრდა შოტლანდიელი ლუდის მწარმოებლები, კომპანია Brewmeister-ის დამფუძნებლები: ლუის შენდი და ჯონ მაკენზი არიან. ისინი, ვინც უკვე დააგემოვნა ,,განკითხვის დღის” ლუდი, ამბობენ, რომ სასმელი, მიუხედავად სიმაგრისა, საკმაოდ რბილი და სასიამოვნო დასალევია. ლუდი უკვე გაიტანეს დიდი ბრიტანეთის ბაზარზე, სადაც მისი შეძენა 80 გირვანქა სტერლინგად შეიძლება. შოტლანდიელ მელუდეთა ბიზნესი ჯერ ახლა იდგამს ფეხს, მაგრამ სავარაუდოდ, ძალიან წარმატებული იქნება, რადგან უკვე საკმაოდ ბევრი შეკვეთა მიიღეს ავსტრალიიდან, შვედეთიდან, აშშ-დან და სხვ.
© ღვინის კლუბი/Weekend
ბეჭდვა
თქვენი კომენტარი