სამხრეთ აფრიკა მეოთხე ადგილზეა

ღვინის მარკეტინგის სამხრეთაფრიკელმა სპეციალისტმა - ტეი კოლარდმა სტატისტიკური კვლევის შედეგები გამოაქვეყნა. მონაცემები ადასტურებს, რომ სამხრეთ აფრიკის რესპუბლიკას ღვინის გაყიდვის მიხედვით მეოთხე ადგილი უკავია ახალი სამყაროს ქვეყნებს შორის. იგი ადგილს მხოლოდ აშშ-ს, ავსტრალიას და არგენტინას უთმობს. რაც შეეხება ღვინის წარმოებას, აქ სამხრეთ აფრიკის რესპუბლიკა მე-9 ადგილზეა.სპეციალისტის ანგარიში გვიჩვენებს, რომ ევროპაში ღვინის მწარმოებელთა შორის თამამად ლიდერობს იტალია, რომელმაც 2006 წელს 5000 მილიონი ლიტრი ღვინო ჩამოასხა. მას მოსდევს საფრანგეთი, ესპანეთი და გერმანია. ვენახების ფართობის მიხედვით სხვა ქვეყნებს ესპანეთი სჯობნის, მომდევნო ადგილებს საფრანგეთი და იტალია ინაწილებენ. ახალი სამყაროს სივრცეში აშშ ლიდერობს, მას მოსდევს არგენტინა, ჩილე, ავსტრალია, სამხრეთ აფრიკის რესპუბლიკა და ახალი ზელანდია. ექსპერტი აღნიშნავს, რომ ევროპის ქვეყნები ჯერჯერობით ყველა მაჩვენებლით ინარჩუნებენ პირველობას, მაგრამ ახალი სამყაროს ქვეყნები (ავსტრალია, ჩილე და სამხრეთ აფრიკის რესპუბლიკა) სტაბილურად და თამამად ვითარდებიან.