საყოველთაოდ ცნობილმა ფრანგული ღვინის ბრენდმა Chateau Latour წინასწარი გაყიდვების კამპანია en primeur-ში მონაწილეობის მიღებაზე უარი განაცხადა, რითაც ძალზე განაცვიფრა ღვინის ექსპერტები და ბაზრის მოთამაშეები. ის მიმდინარეობისას კომერსანტები და ელიტარული ღვინის მოყვარულები წინასწარ, ბოთლებში ჩამოსხმამდე ყიდულობენ ღვინოს ანუ ისინი ნაკლებ ფულს ხარჯავენ, ღვინის საბოლოოდ მომწიფებას ელოდებიან და შემდეგ უფრო სარფიანად ყიდიან. სწორედ ეს ტრადიცია დაარღვია Chateau Latour -მა, როდესაც განაცხადა, რომ ამიერიდან მხოლოდ ბოთლებში ჩამოსხმულ ღვინოს გაყიდის. კომპანიის დირექტორმა ფრედერიკ ენგერერმა ბორდოელ ვაჭრებს ამის შესახებ წერილობით აცნობა. კომპანიის მესვეურები არ ამხელენ მიზეზს, თუ რამ განაპირობა მათი ასეთი ნაბიჯი. ექსპერტთა აზრით, ეს კომპანიის აგრესიული ბიზნეს-სტრატეგიის შედეგია, რომლის მეშვეობითაც ღვინის დისტრიბუცია შუამავლების გარეშე უნდა მოხდეს. ექსპერტთა ნაწილი კომპანიის ამგვარ საქციელს აზიის, კერძოდ კი ჩინეთის ბაზარს უკავშირებს. ბოლო დროს სწორედ ჩინელები ყიდულობენ ბოთლებში ჩამოსხმულ ძვირფას ღვინოს დიდი რაოდენობით.
© ღვინის კლუბი/Weekend
ბეჭდვა
თქვენი კომენტარი