ავსტრალიური გიგანტი AGL Energy ჰანტერის დაბლობზე მდებარე გაზის საბადოების ათვისებას გეგმავს. სწორედ ამ მიზეზის გამო შეიძინა კომპანიამ Poole's Rock დაYellow Rock Estate-ს ვენახები. კომპანიის წარმომადგენლებმა უკვე განაცხადეს, რომ აღნიშნულ მონაკვეთზე მიმდინარე სასოფლო-სამეურნეო სამუშაოები არ შეჩერდება. როგორც საწარმოს დირექტორმა მაიკ მორაზამ განაცხადა, საწარმო ეკოლოგიურად სუფთა და უსაფრთხო იქნება, არანაირ მავნე ზეგავლენას არ მოახდენს გარემოზე. თუმცა ჰანტერის დაბლობის დაცვის ალიანსის (Hunter valley Protection Alliance) წევრები კატეგორიულად ეწინააღმდეგებიან ენერგეტიკოსთა ამ ინიციატივას და ვენახების განადგურების შეწყვეტის მოთხოვნით გამოდიან. ალიანსის წევრები იმ ფაქტსაც აპროტესტებენ, რომ ავსტრალიის მეღვინეობის სხვა რეგიონებისგან (ბაროსას ველი, მაკლარენი, მარგარეტ რივერი) განსხვავებით, ახალ სამხრეთ უელსში მევენახეობისა და მეღვინეობის დასაცავად არანაირი ღონისძიება არ ტარდება.
ავსტრალიის გარდა, მსგავსი პრობლემები აქვთ მეღვინეობის სხვა ქვეყნებსაც. მაგალითად, საფრთხის ქვეშ დგას განთქმული უნგრული ღვინო ტოკაის წარმოება - სასარგებლო წიაღისეულის, კერძოდ კი ტუფის კარიერები ვენახების სიახლოვესაა განლაგებული. რა გასაკვირია, რომ ეს ფაქტი უნგრელ მეღვინეებს მოსვენებას უკარგავს.
© ღვინის კლუბი/Weekend
ბეჭდვა
თქვენი კომენტარი