ფალსიფიცირებული ქართული ღვინოების ახალი პარტია

ევროკავშირის ქვეყნებში ფალსიფიცირებული ქართული ღვინოები ძირითადად რუსულ მაღაზიებში იყიდება და მათი მომხმარებელი ყოფილი საბჭოთა კავშირიდან, მეტწილად - რუსეთიდან ემიგრირებული მოსახლეობაა. ამ სეგმენტის საბჭოურ ნოსტალგიას რუსული მაღაზიების მფლობელები ფალსიფიცირებული "დათუნია კამფეტებით", "სგუშონი მალაკოებით", "დოქტორსკი კალბასებითა" და რაღა თქმა უნდა, ქართული დასახელების ღვინოებით აკმაყოფილებენ. თუმცა, ამ ღვინოებს მხოლოდ დასახელება აქვთ ქართული - "ხვანჭკარა", "ახაშენი", "ქინძმარაული", "მუკუზანი", "ოჯალეში" და ა. შ. სხვა მხრივ, მათ საქართველოსთან არანაირი კავშირი არა აქვთ.

ახლახანს "ღვინის კლუბის" წარმომადგენელმა ფალსიფიცირებული ქართული დასახელების ღვინოები აღმოაჩინა ბელგიის ქალაქ ლიეჟში, რუსული მაღაზიის - "ტერემოკის" დახლებზე. გაყალბებული "ხვანჭკარას", "ახაშენისა" და "ქინძმარაულის" ეტიკეტებზე გერმანულად და ფრანგულად აწერია, რომ ეს არის სუფრის ღვინო, ჩამოსხმული ევროკავშირის სხვადასხვა ღვინოებისგან. ჩამოსხმის ადგილად მითითებულია საფრანგეთი, მაგრამ მისამართი ან ქუჩა დაზუსტებული არ არის.
"ღვინის კლუბის" წარმომადგენელმა გასინჯა ფალსიფიცირებული "ხვანჭკარა" და იგი აღმოჩნდა მდარე ხარისხის ღვინო, რომელსაც ნამდვილ "ხვანჭკარასთან" არანაირი კავშირი არა აქვს. ცხადია, ასევე მდარე იქნება სხვა ქართული დასახელების ღვინოებიც.
ევროკავშირის ქვეყნების სავაჭრო ქსელიდან ფალსიფიცირებული ღვინოების ამოღებას, სასამართლოს გზით, ჯერჯერობით არც ერთი ქართული კომპანია არ ცდილობს. საჭიროა უფრო მეტად იაქტიუროს სოფლის მეურნეობის სამინისტრომაც, რომელსაც ევროპელ მაკონტროლებელ სამსახურებზე ზემოქმედების მეტი ბერკეტები აქვს. ნათელია, რომ საქმე გვაქვს საბოტაჟთან, რითაც ნამდვილ ქართულ ღვინოებს რეპუტაცია ელახება და მომხმარებელი ეკარგება. ეს კი აუნაზღაურებელი ზარალია ქართველი ღვინის მწარმობლებისათვის.