Riccardo Cotarella ერთ-ერთი ყველაზე ცნობილი იტალიელი ღვინის ექსპერტი და მწარმოებელია, არის Cotarella & Chiasso-სა და Vivai Rauscedo-ს დამფუძნებელი, ასევე იტალიის სომელიეთა ასოციაციის ყოფილი პრეზიდენტი. როგორც Cotarella & Chiasso-ს გვერდზე ვკითხულობთ, ქართველ მეღვინეებთან თანამშრომლობით ახალ პროექტს აანონსებენ, რომელსაც სწორედ კოტარელა, ხელმძღვანელი Pier Paolo Chiasso და მათი მეღვინეთა გუნდი ჩაუდგება სათავეში ორ ქართველ მეწარმესთან, ბაჩო ბუღდიაშვილთან და ვატო ოთხმეზურთან ერთად. პროექტი ტერუარის ტიპურ ყურძენზე სხვადასხვა ექსპერიმენტების ჩატარებას მოიცავს. უმთავრესი ჯიშებია საფერავი და რქაწითელი, თუმცა იმუშავებენ მწვანეზე, ხიხვზე, ალექსანდრულზე, მუჯურეთულსა და ოჯალეშზე. პროექტი თბილისის სახელმწიფო უნივერსიტეტთან თანამშრომლიბით განხორციელდება.
ახალი ნარგავები თბილისიდან 40 კმ-ში, ხაშმის ზონაში მდებარეობს, სადაც ვენახების გარდა თანამედროვე ღვინის საწარმოც აშენდება. ვაზი 10 ჰექტარზე უკვე დარგულია, მას კი მომავალში 100 ჰექტრიანი ვენახებიც მოჰყვება. ვაზის კალმები Cooperativa Vivai Rauscedo-ს მიერ არის შერჩეული: “ჩემთვის ძალიან დიდი პატივია ჩავერთო პროექტში, რომელიც მაკავშირებს მევენახეობის სამშობლოსთან, საქართველოსთან, და მის მწარმოებლებთან. ჩემი კარიერის ამდენი წლის განმავლობაში არასოდეს მიცდია ამ საოცარ ქვეყანაში მემუშავა, ახლა კი მაქვს შესაძლებობა ვიმუშაო ქართულ ვაზთან, შევეჭიდო დაბრკოლებებს, ჩავატარო კვლევები. დარწმუნებული ვარ, რომ ჩვენს კოლაბორანტებთან ერთად მოვახერხებთ, ქართულ ღვინოს ახალი იმპულსი მივცეთ. მიზანი სწორედ ისაა, რომ ქართულმა ღვინოებმა მეტ წარმატებას მიაღწიონ. ჩვენ ნამდვილად მივალთ მიზნამდე, რადგან ცოდნა და ღვინის მიმართ ძალიან დიდი სიყვარული გვაქვს. თავიდან ნახევარი მილიონი ბოთლის წარმოებით დავიწყებთ, წითელი, თეთრი და ცქრიალა ღვინოებით, პირველი მოსავალი 2024 წელს იქნება, თუმცა უკვე ვმუშაობთ ახალი ვენახებისა და ვაზის კალმების დარგვის სხვა პროექტზეც, ასევე იმაზეც, რომ საწარმო ავაშენოთ” - განმარტავს კოტარელა. ვრცლად გაეცაინით Wine News-ის გვერდზე.
© ღვინის კლუბი/vinoge.com
ბეჭდვა
თქვენი კომენტარი