“ალავერდის მონასტრისა” და ,,ბადაგონის” ღვინო რეგიონალური ჯილდოს მფლობელია

ლონდონში, ჟურნალ „დეკანტერის" ღვინის საერთაშორისო კონკურსზე კომპანია „ბადაგონის" მიერ ჩამოსხმული ალავერდის მონასტრის წითელი ტრადიციული ღვინო უმაღლესი პრიზით დაჯილდოვდა. ცენტრალური და აღმოსავლეთ ევროპის რეგიონალური ჯილდო 10 ფუნტზე მეტი ღირებულების წითელი ღვინის ნომინაციაში მართლაც რომ საუკეთესო შედეგია, მსგავსი ჯილდო ქართულ ღვინოს აქამდე არასოდეს მიუღია. დიდი ოქროს მედალი „ბადაგონს" ალავერდის მონასტრის მარანში წარმოებული წითელი მშრალი ღვინისთვის გადაეცა. კომპანიის ინფორმაციით, კონკურსზე გაგზავნილმა ქვევრის თეთრმა ღვინომ, „კახურმა წარჩინებულებმა" და „ტრიონმა" ბრინჯაოს მედლები და აღიარების დიპლომები დაიმსახურა. „ბადაგონში" დიდ გამარჯვებას უწოდებენ „დეკანტერზე" კომპანიის მიერ წარმოებული ღვინოების აღიარებას და მანამდე მიღებულ სხვა ჯილდოებს შორის მას ერთ-ერთ ყველაზე მნიშვნელოვნად მიიჩნევენ. ,,ეს ქართული ღვინის მორიგი საერთაშორისო აღიარებაა", - აცხადებს კომპანიის გენერალური დირექტორი გიორგი სალაყაია. მისივე თქმით, ბოლო ერთი თვის მანძილზე ჩატარებულ კონკურსებზე „ბადაგონის" ღვინოებს ერთმანეთის მიყოლებით მიანიჭეს ოქროს, ვერცხლისა და ბრინჯაოს მედლები. გიორგი სალაყაია დარწმუნებულია, რომ ეს მიღწევები ხელს შეუწყობს კომპანიას, ღირსეული ადგილი დაიკავოს ღვინის მსოფლიო ბაზარზე.