ღვინის თემა კინემატოგრაფში

ღვინო და მეღვინეობა მსოფლიო კულტურის განუყოფელ ნაწილად იქცა. კინემატოგრაფისტები ამ თემას სულ უფრო და უფრო ხშირად მიმართავენ. დოკუმენტური ფილმის - Mondovino კვალდაკვალ, რომელიც მეღვინეობის გლობალიზაციას ეძღვნება, გამოჩნდა ღვინის თემაზე შექმნილი მხატვრული ფილმებიც. ფილმმა "გზისპირზე" (Sideways), რომლის მთავარი გმირიც პინო ნუარის ტრფიალია, აშშ-ში და დასავლეთ ევროპის ქვეყნებში ამ ღვინის ბუმი გამოიწვია. "კარგი წელი" (A Good Year) რასელ ქროუს მონაწილეობით მოგვითხრობს, თუ როგორ შეცვალა ღვინომ ინგლისელი ფინანსისტის ცხოვრება. ფილმს "დარტყმა ბოთლით" (Bottle Shock) საფუძვლად უდევს პარიზში გამართული დეგუსტაცია, სადაც კალიფორნიულმა ღვინოებმა დაჯაბნეს საუკეთესო ფრანგული სახეობები და გზა გაუხსნეს ახალი სამყაროს ღვინოებს. იგივე თემაზე მზადდება კიდევ ერთი ფილმი - "სასამართლო პარიზში", სადაც იმ მოვლენათა უშუალო მონაწილე, ბრიტანელი ღვინის ექსპერტი, სტივენ სპურიე იღებს მონაწილეობას.