– როდის გადაწყვიტეთ მარნის დაარსება და რა იყო ამის მიზეზი?
– ასე კონკრეტულად აღარც კი მახსოვს როდის მივიღე ეს გადაწყვეტილება, რადგან ვაზის მოვლასა და ღვინის დაყენებაში ყოველთვის ჩართული ვიყავი, თუმცა ჩემი ბრენდით პირველად 2017 წლის მოსავალი ჩამოვასხით.
– ვაზის რომელი ჯიშები გაქვთ გაშენებული და კიდევ რომელ ჯიშებზე აპირებთ ყურადღების გამახვილებას?
– ამ ეტაპზე მაქვს მხოლოდ ტვიშის ცოლიკოური, ჯერჯერობით არ განვიხილავ ახალი ჯიშების დამატებას.
– რა ღვინოებს აწარმოებთ და რითაა გამორჩეული თქვენი ღვინო?
– ტვიში არის ადგილწარმოშობის ღვინო, ვაზი გაშენებულია ცნობილ მიკროზონაში, სოფელ ტვიშში, ღვინო ხასიათდება მწიფე ხილის არომატებით, არის მსუბუქი და ჰაეროვანი.
– გაიხსენეთ საქართველოში ღვინის გაყიდვის თქვენი პირველი გამოცდილება, რომელ მაღაზიებთან გქონდათ ურთიერთობა?
– ჩემი ღვინის პირველი დეგუსტაცია რესტორან „ბინა 37“-ში მოეწყო, პირველი მაღაზია კი „ზეღვინო“ იყო.
– გადის თუ არა თქვენი ღვინო უცხოეთის ბაზარზე?
– ახლო მომავალში ვგეგმავთ ამერიკის ბაზარზე შეტანას.
– რა სახის სირთულეები შეგხვედრიათ თქვენს საქმიანობაში? რა უნდა დაიხვეწოს ყველაზე მეტად ღვინის სფეროში?
– განსაკუთრებული სირთულე არ მახსენდება, პატარა სირთულე და დაბრკოლება კი ერთგვარი სტიმულის მომცემია.
– თქვენი აზრით, რა არის ყველაზე მნიშვნელოვანი ფაქტორები თანამედროვე ქართული ღვინის კულტურის განვითარებისთვის?
– პირველ რიგში, მთავარია დაიხვეწოს ღვინის ხარისხი და ჩვენი პროდუქციის შესახებ ინფორმაცია მომხმარებელს სწორად მიეწოდოს.
– რას ურჩევდით დამწყებ მევენახე–მეღვინეებს?
– არასდროს დაგეზაროთ შრომა და ყოველთვის გიყვარდეთ თქვენი საქმე, მაშინ ყველაფერი გამოგივათ!
მარნის დასახელება: მირანდას ღვინო
მარნის მისამართი: ცაგერის მუნიციპალიტეტი, სოფელი ტვიში
ტელეფონი: +995 598264378
ელფოსტა: micowinery@gmail.com
ვებ/ფეისბუკ გვერდი: მირანდას ღვინო Miranda's wine
© საქართველოს ღვინის კლუბი, ღვინის ეროვნული სააგენტო, ღვინის საინფორმაციო ცენტრი
ბეჭდვა
თქვენი კომენტარი