ქართული ღვინო კანადაში

ბოლო წლებში ქართული ღვინის მიმართ ინტერესი საერთაშორისო ბაზრებზე სტაბილურად იზრდება, ეს ტენდენცია კანადაშიც შესამჩნევია. 2024 წლის იანვარ-თებერვლის მონაცემებით, გაიგზავნა 1 702 156 ბოთლი ქართული ღვინო, რაც არა მხოლოდ რაოდენობრივ ზრდაზე მიუთითებს, არამედ იმაზე, რომ ქართული ღვინის მწარმოებლები და ექსპორტიორები მიზანმიმართულად და სტრატეგიულად აფართოებენ თავიანთ წარმომადგენლობას კანადურ ბაზარზე. ეს მაჩვენებელი ასახავს ბაზრის მზაობას ქართული ღვინის მისაღებად და ადგილობრივი იმპორტიორების მზარდ ინტერესს — რაც თავის მხრივ რეალურ წინაპირობას ქმნის ქართული ღვინის მეტად დამკვიდრებისთვის

ზრდადი ინტერესი და ბაზრის პოტენციალი

კანადური ღვინის ბაზარი ყოველწლიურად დაახლოებით 6.8 მილიარდი კანადური დოლარით იზრდება, რაც ერთ-ერთ ყველაზე დინამიკურ და განვითარებად ბაზრად აქცევს მას. ამ პირობებში ქართული ღვინის როლის გაძლიერება განსაკუთრებით მნიშვნელოვანია. ბოლო წლების განმავლობაში იმპორტიორთა რიცხვი, რომლებიც ქართული ღვინით ინტერესდებიან, ყოველწლიურად 3–5%-ით მატულობს. უფრო კონკრეტულად, იმპორტიორების 70%-ზე მეტი აღნიშნავს, რომ მათთვის ქართული ღვინის გაყიდვები მზარდია, რაც დადებითი ტენდენციის მკაფიო მაჩვენებელია. ამგვარი სტაბილური ზრდა მეტყველებს იმაზე, რომ ქართული ღვინო თანდათან იღებს თავის ადგილს კონკურენტულ ბაზარზე და რომ მოთხოვნა იმოქმედებს ახალი სახელწოდებების, ტიპების და რეგიონების ექსპორტზე.

წამყვანი იმპორტიორები

ქართული ღვინის წარმატება დიდწილად დამოკიდებულია არა მხოლოდ მის ხარისხზე, არამედ იმპორტიორებთან სწორად ჩამოყალიბებულ ურთიერთობაზე. დღესდღეობით სხვადასხვა კანადურ პროვინციაში უკვე ჩამოყალიბდა სტაბილური პარტნიორული ქსელი:

• ონტარიოში ისეთი კომპანიები, როგორიცაა The Living Vine, Nicholas Pearce Wines და Profile Wine Group, აქტიურად ყიდიან ქართულ ღვინოს და ჩართული არიან ღვინის დაგემოვნების, პრეზენტაციების და სომელიეს ტრენინგების ორგანიზებაში.
  კვებეკში — Boire და A3 Quebec — ორი წამყვანი მოთამაშეა, რომლებიც ქართულ ღვინოს ნატურალური ღვინოების კატეგორიაში აყვანის საშუალებით პოზიციონირებენ.
• დასავლეთ კანადაში (BC/ალბერტა) — Juice Imports, The Wine Syndicate, Vino Al Vino და AmoVino — სპეციალიზდებიან ავთენტური ღვინის პოპულარიზაციაში. მათთან პარტნიორობა ნიშნავს წვდომას უფრო ინოვაციურ და ღია აუდიტორიებზე.

მომხმარებლების მოლოდინები და პრეფერენციები

კანადელი ღვინის მომხმარებლები, ბაზრის კვლევების მიხედვით, განსაკუთრებულ ყურადღებას ამახვილებენ ღვინის წარმომავლობაზე (82%), რაც მათთვის მიუთითებს ღვინის ავთენტურობასა და უნიკალურობაზე. ფასს (65%) და ბრენდის ცნობადობასა და რეპუტაციას (58%) ასევე დიდი მნიშვნელობა ენიჭება. ამ მაჩვენებლების ფონზე, ქართული ღვინო შედარებით კარგ პოზიციაშია, რადგან ქვევრის მეთოდი, ძველი ვაზის ჯიშები და კულტურა შესაბამისობაშია იმ ღირებულებებთან, რასაც თანამედროვე კანადელი მომხმარებელი ეძებს. ამიტომ, მნიშვნელოვანია, რომ ბრენდირება სწორედ ამ ასპექტებზე გაკეთდეს და არ დაივიწყოს მეღვინეებმა ადგილობრივი მომხმარებლის მოთხოვნებიც.

ქართული ღვინის  მოთხოვნა და მოხმარება 

ქართული ღვინის მოხმარება კანადაში სხვადასხვა არხით ხორციელდება. დღესდღეობით ღვინის საბოლოო მოხმარება ნაწილდება შემდეგნაირად: დაახლოებით 15% – ბარებში, რესტორნებსა და სპეციალიზებულ მაღაზიებში, სადაც მომხმარებელი ხშირად პირველად ეცნობა ქართულ ღვინოს. ონლაინ გაყიდვები განსაკუთრებით პოპულარულია კვებეკში (22%) და ბრიტანეთის კოლუმბიაში (BC), სადაც მაჩვენებელი 35%-ს აღწევს. ეს ნიშნავს, რომ კარგი ციფრული სტრატეგია და ეფექტური ონლაინ ვიტრინები, მათ შორის ვიზუალი, გადამწყვეტ როლს თამაშობს გაყიდვების ზრდაში. იმპორტიორები ასევე ხაზს უსვამენ ტრადიციული დეგუსტაციების, უნიკალური ჯიშებისა და ექსპერიმენტული ღვინოების პოპულარობას, რაც ქართულ ღვინოს მნიშვნელოვან კონკურენტულ უპირატესობას აძლევს.

აუდიტორიის პროფილი და ფასის მოდელირება

კვლევის შედეგად გამოვლინდა, რომ ქართული ღვინის მომხმარებელთა ძირითადი ჯგუფი არის ახალგაზრდა პროფესიონალები (18-30 წლის), რომლებსაც მაღალი შემოსავალი და კულტურული ცნობისმოყვარეობა აქვთ. მათთვის მნიშვნელოვანია პროდუქტის ისტორია, უნიკალურობა და ეთიკურობა. ამავე დროს, ყველაზე გაყიდვადი ფასის სეგმენტი მერყეობს $18-30 CAD შორის, რაც მიუთითებს, რომ პროდუქტმა არ უნდა გადალახოს ეს ზღვარი, თუ მიზანია ფართო ბაზარზე გასვლა . სწორი ფასის დადება და ხელმისაწვდომობის სტრატეგია ხელს შეუწყობს მყარი მომხმარებლის ბაზის ჩამოყალიბებას.

პროგნოზი და განვითარების გზები

მომავლის პერსპექტივით, იმპორტიორთა 72% თვლის, რომ მოთხოვნა ქართული ღვინის მიმართ გაიზრდება, თუ მისი ხარისხი შენარჩუნდება და სწორად მოხდება ბრენდინგი. ეს ნიშნავს, რომ წარმატება დიდწილად დამოკიდებული იქნება იმაზე, თუ რამდენად თანმიმდევრულად და სიღრმისეულად მიეწოდება მომხმარებელს ინფორმაცია ღვინის წარმომავლობაზე, მეთოდზე, ისტორიასა და კულტურულ ნაწილზე. უფრო ინტენსიური საგანმანათლებლო კამპანიები, დეგუსტაციები, სომელიეს ტრენინგები და პარტნიორობა ადგილობრივ ფესტივალებთან — ეს არის ის მექანიზმები, რომელთა მეშვეობითაც ქართული ღვინო კანადურ ბაზარზე შეძლებს გამორჩეულ პოზიციის დამკვიდრებას.

© ღვინის კლუბი/vinoge.com