6-7 თებერვალს რომში, ნატურალური ღვინის გამოფენის - Vini Naturali a Roma - მერვე გამოშვება გაიმართა. გამოფენა, ტრადიციულად პრესტიჟულ სასტუმრო - Excelsior-ში მოეწყო და მასში მონაწილეობას იღებდნენ მწარმოებლები იტალიიდან, საფრანგეთიდან, ავსტრიიდან, ესპანეთიდან, გერმანიიდან, საქართველოდან და პორტუგალიიდან.
ღონისძიებაში წელს მონაწილეობდა ასზე მეტი კომპანია - ძირითადად, ღვინის, ასევე, ლუდისა და საკვები პროდუქტების მწარმოებლები. Vini Naturali a Roma-ზე საქართველოს წარმოადგენდა ნიკა ბახიას, ნაოტრებისა და ბექა გოცაძის მეღვინეობები.
გამოფენის დამფუძნებელი, ტიციანა გალო ამბობს, რომ ღონისძიება თავს უყრის იმ ადამიანებს, ვისაც განსაკუთრებული დამოკიდებულება აქვს მიწისა და ბუნების მიმართ. მათ შორისაა საქართველო, რომელიც გამოფენის სტუმრებს „ქვევრის საოცარ ღვინოებს“ სთავაზობს.
2009 წელს, როცა ტიციანა გალომ პირველად ჩაატარა გამოფენა, სახელწოდებით Vini Naturali a Roma, მასში სულ რამდენიმე მეღვინეობა იღებდა მონაწილეობას. მაშინ იტალიაში ნატურალური ღვინოები არ სარგებლობდა დიდი პოპულარობით. მას შემდეგ მსოფლიოში ნატურალური, ორგანული და ბიოდინამიკური გამოცდილებები სწრაფად განვითარდა, ამიტომ ღონისძიებაზე ყოველწლიურად იზრდება მონაწილე კომპანიების რიცხვი. გამოფენაზე ყოველწლიურად დიდი ყურადღება ეთმობა ქვევრის ბუნებრივ ღვინოებს საქართველოდან.
© საქართველოს ღვინის კლუბი, ღვინის საინფორმაციო ცენტრი
ბეჭდვა
თქვენი კომენტარი