უცხოელი ღვინის მოყვარულები საქართველოში სტუმრობისას ხშირად აღმოაჩენენ ხოლმე მათთვის ძალიან შთამბეჭდავ და უცხო ღვინოებს, რომლებზეც მერე აუცილებლად წერენ ხოლმე ბლოგებს, სტატიებსა თუ რჩევებს თავიანთი მკითხველისთვის. ღვინის ექსპერტი ანდრეა ლემიუც სწორედ მათ შორისაა, რომელიც The Quirky Cork-ის ვებ-გვერდზე თავკვერზე წერს.
თავდაპირველად აღნიშნავს, რომ ამ ვაზის ჯიშისგან სხვადასხვა ტიპის ღვინის დაწურვაა შესაძლებელი, იქნება ეს ცქრიალა, სადესერტო, ვარდისფერი თუ ქვევრის ღვინო: “თუმცა, მიუხედავად სტილისა, მას, როგორც წესი, ალუბლისა და მიწის არომატები ახასიათებს მცენარეული ნოტებით, რაც საკმაოდ შთამბეჭდავია.” - დასძენს ავტორი.
ლიმიუ, როგორც ვკითხულობთ, განსაკუთრებით მოიხიბლა 2019 წლის Okro’s Wines Sister’s Wine თავკვერი პეტ-ნატით: “განსაკუთრებით ვისიამოვნე ამ ღრმა, მუქი წითელი ღვინით, რომელიც ჩემთვის გარკვეულწილად დამაბნეველი და მოულოდნელიც იყო. ღვინოში აუცილებლად ამოიცნობთ ალუბლისა და მოცვის არომატებს, მძაფრად იგრძნობა მცენარეული ნოტებიც. ცოცხალი ხასიათი და მჟავიანობა კი უფრო საინტერესოს ხდის მას.” - წერს ავტორი.
შემდეგია “ღვინის ოსტატების” 2018 წლის თავკვერი. თავკვერის საძებნელად თბილისში ჩასულმა ლიმიუმ ნინო მერის ღვინის სელექციაში სწორედ “ღვინის ოსტატების” თავკვერი აღმოაჩინა, რომელიც ქვევრში 8 თვის განმავლობაში იყო, შემდეგ ფოლადის ცისტერნაში 12 თვე გაატარა, ბოლოს კი ფრანგულ მუხის კასრში 3 თვის მანძილზე ვარგდებოდა: “ ეს ღრმა, მეწამული ფერის ღვინო ყვავილების არომატით, რომელსაც თანდათან ქლიავის, მაყვლისა და მოცხარის სურნელება უერთდება, საკმაოდ ტანინიანია და ცოცხალი მჟავიანობით გამოირჩევა. ზოგიერთ არომატს ფრაგმენტულად იგრძნობთ, შიგადაშიგ, თუმცა მასში დომინანტური ნამდვილად მიწის, ტყის არომატებია” - აღნიშნავს ავტორი. სტატიას სრულად შეგიძლიათ The Quirky Cork-ის ვებ საიტზე გაეცნოთ.
© ღვინის კლუბი/vinoge.com
ბეჭდვა
თქვენი კომენტარი