ადამიანის წინაპრებს ეთილის სპირტის გადამუშავების უნარი ჯერ კიდევ მიოცენის ეპოქაში განუვითარდათ. ამის მიზეზი კი ის გახდა, რომ მათ ამჟავებული ხილის ჭამა დაიწყეს. ეს აღმოჩენა სანტა-ფეს (აშშ) კოლეჯის მეცნიერებს ეკუთვნით, რომლებმაც 28 სახეობის ძუძუმწოვარი, მათ შორის 17 პრიმატი, შეისწავლეს. გამოკვლევამ აჩვენა, რომ ფერმენტი ADH4, რომელიც ორგანიზმში ალკოჰოლის დაშლას უწყობს ხელს, ადამიანების წინაპრებს მაშინ ჩამოუყალიბდათ, როცა ხიდან მიწაზე ჩამოვიდნენ და ძირს ჩამოცვენილი, დამპალი ხილის ჭამა დაიწყეს. სულ მალე კი მათმა ორგანიზმმა ადაპტაცია განიცადა და ეთილის სპირტი გადაამუშავა. დღეს ალკოჰოლის შეთვისების უნარი, ადამიანის გარდა, შიმპანზეებსა და გორილებსაც გააჩნიათ. ორანგუტანებს კი სხვაგვარი მეტაბოლიზმი ახასიათებთ, რადგან ჯერ კიდევ ხეებზე ბინადრობენ.
ეს აღმოჩენა ეწინააღმდეგება იმ მოსაზრებას, თითქოს ფერმენტი ADH4 მხოლოდ ნეოლითის ხანაში განუვითარდათ მიწათმოქმედებს. დღემდე მიჩნეული იყო, რომ ყველაზე ადრეული ხანა, როცა ადამიანი ალკოჰოლს გამოიყენებდა, ჩვ. წ. აღ-მდე მე-7 ათასწლეული იყო. სწორედ ამ პერიოდში თანამედროვე ჩინეთის ჩრდილოეთით მცხოვრებმა ადამიანებმა ხილისა და თაფლისაგან ნაკლებალკოჰოლური სასმელის დამზადება ისწავლეს. ზოგ მეცნიერს კი მიაჩნია, რომ ნეოლითის ხანის მიწათმოქმედებს ბრინჯი, ქერი და სიმინდი სწორედ ალკოჰოლური სასმელების დასაყენებლად მოჰყავდათ, ამ სასმელს კი ისინი ყოველდღიურად მიირთმევდნენ.
© ღვინის კლუბი /Weekend
ბეჭდვა
თქვენი კომენტარი