ნაპას ველის ვენახების განახლებისათვის მასშტაბური კამპანია ჩატარდა, თუმცა მევენახეები გაუთვალისწინებელ დაბრკოლებას წააწყდნენ – სარგავი მასალა არასაკმარისი აღმოჩნდა. მრავალმა სანერგემ 2014-2015 წლების შეკვეთა უკვე მიიღო. კალიფორნიაში ვაზს საშუალოდ 20 წელიწადში ერთხელ რგავენ, რადგან ბებერი ვაზი ბევრ ნაყოფს ვეღარ ისხამს. გასული საუკუნის 80-იან წლებში მრავალი ვენახი ფილოქსერას ეპიდემიამ გაანადგურა. ახლა, როცა ღვინის კომპანიებმა რეცესია დაძლიეს და პრემიალურ ღვინოებზე მოთხოვნა კვლავ გაიზარდა, მეპატრონეები ვენახის განახლებაზეც ფიქრობენ. ვენახებს მუდმივად ანახლებენ – ამაგრებენ იმ ფერდობებს, რომელთაც ეროზია ემუქრება, აფართოვებენ მწკრივებს შორის სივრცეს, რათა სამომავლოდ შესაძლებელი იყოს მოსავლის მექანიკური გზით აღება და ყურძნის საკრეფმა მანქანამ თავისუფლად იმოძრაოს. მევენახეები განსაკუთრებულ ყურადღებას აქცევენ ვაზის კლონურ სელექციას, არჩევენ ამა თუ იმ ადგილის მიკროკლიმატისათვის შესაფერ ნერგებს. ამ ყველაფერმა კი გამოიწვია სარგავი მასალის შემცირება. იმისათვის, რომ კალიფორნიელმა მეწარმეებმა თავიდან აიცილონ ფინანსური ზარალი, იძულებულები გახდნენ, ერთმანეთში შეთანხმდნენ და ვაზის გადარგვის დეტალური გეგმაც ერთობლივად შეიმუშავონ.
© ღვინის კლუბი/Weekend
ბეჭდვა
თქვენი კომენტარი