გიორგი ღვინიაშვილი რთველის მიმდინარეობას აფასებს

პრეზიდენტის რწმუნებული კახეთის მხარეში, გიორგი ღვინიაშვილი რეგიონში მიმდინარე რთველს აფასებს. მისი განცხადებით, წლევანდელი რთველი სხვა წლებისგან განსხვავებით, იმით გამოირჩევა, რომ სახელმწიფოს მხრიდან გამოყოფილმა სუბსიდიამ შედეგი გამოიღო და მევენახეების დიდმა ნაწილმა მოწეული მოსავალი ღვინის ქარხნებს ჩააბარა. "ქვეყანაში არსებული უმძიმესი მდგომარეობის მიუხედავად, სახელმწიფომ უპრეცენდენტო შემთხვევა დაუშვა, რაც იმაში გამოიხატა, რომ პირდაპირი ფინასური დახმარება გაუწია კახელ გლეხს. მე თამამად შემიძლია ვთქვა, რომ წელს კახეთში რთველი 2008 წარმატებით მიმდინარეობს" - განუცხადა რადიო ჰერეთს გიორგი ღვინიაშვილმა.

რეგიონის გუბერნატორი, ქარხნებთან წარმოქმნილი რიგების პრობლემებსაც შეეხეო. ღვინიაშვილი აცხადებს, რომ ყოველ ღამე თავად მიდის ქარხნებთან და რიგების დარეგულირებას ცდილობს. "როდესაც არის რთველი, რიგები ქარხნებთან გარდაუვალია, თუმცა ეს ძირითადად გაუთვალისწინებელი ტექნიკური პრობლემების გამო ხება" - აცხადებს ღვინიაშვილი. აღსანიშნავია, რომ რთველი კახეთში უკვე დასასრულს უახლოვდება. სოფლის მეურნეობის სამინისტროს საკოორდინაციო შტაბის ინფორმაციით, სავარაუდოდ 15 ოქტომბრისთვის "რთველი 2008" დასრულებული იქნება.

რადიო "ჰერეთი"