გამოქვეყნებულია: 4 ნოემბერი, 2010 - 07:10
ამერიკის შეერთებულ შტატებში, დევისში, კალიფორნიის უნივერსიტეტის ბაზაზე ღვინის ულტრათანამედროვე საწარმო გაიხსნა. მის ტერიტორიაზე 5 ჰექტარი ვენახია გაშენებული, სადაც შესაძლებელია იმ ახალი ტექნოლოგიის გამოცდა, რომელიც გარემოს შენარჩუნებისა და გაჯანსაღების მიზნით შეიქმნა. ქარხანა აღჭურვილია მსოფლიოში პირველი უკაბელო ფერმენტაციის სისტემით, ავტომატურად რეგულირებადი ტემპერატურის რეჟიმითა და სენსორებით, რომელთა საშუალებითაც ღვინოში შაქრის რაოდენობა ყოველ 15 წუთში ერთხელ კონტროლდება.
როგორც საინფორმაციო სააგენტოები იტყობინებიან, კომპლექსის მშენებლობაზე 20 მილიონი დოლარი დაიხარჯა. ის 3 ათას კვადრატულ მეტრზეა განთავსებული და ღვინის ულტრათანამედროვე საწარმოს გარდა ლუდსახარშსაც მოიცავს. ქარხანაში მზის ენერგიას გამოიყენებენ. ტექნოლოგიური პროცესებისათვის საჭირო წყალს ჩვეულებრივი წვიმის წყლისგან მიიღებენ, რომლის შესაგროვებლადაც სპეციალური ავზებია დამონტაჟებული. პროექტის ინჟინრებმა რეზერვუარების ისეთი სისტემა შეიმუშავეს, რომ ფერმენტაციის შედეგად გამოყოფილი ნახშირბადი ატმოსფეროში არ გაიფანტება და, შესაბამისად, გლობალურ დათბობაზეც არ იმოქმედებს.
© ღვინის კლუბი/“Weekend“
ბეჭდვა
თქვენი კომენტარი