Home
ქართული | English
მარტი 2024
ორშსამოთხხუთპარშაბკვი
26272829123
45678910
11121314151617
18192021222324
25262728293031

შეიძინეთ ჩვენი წიგნები ღვინის მაღაზიებში

მულტიმედია

კომენტარები

თერჯოლის მუნიციპალიტეტში მეღვინეობის კოოპერატივები დაარსდა

ფოტოები: enpard.ge

მეღვინეობა საზანო და თერჯოლის ღვინო - რამდენიმე თვის წინ დარეგისტრირდა, როგორც სასოფლო-სამეურნეო კოოპერატივები. სულ ახლახანს კი თერჯოლის მუნიციპალიტეტში იმერეთის მხარის გუბერნატორმა, გივი ჭიჭინაძემ და ჩეხეთის რესპუბლიკის საელჩოს წარმომადგენელმა, ალბერტ საიდომ ამ ორი კოოპერატივის მცირე მარნები ოფიციალურად გახსნეს. 

საწარმოების შექმნა კოოპერატივებმა Enpard-ისა (ევროპის სამეზობლო პროგრამა სოფლისა და სოფლის მეურნეობის განვითარებისთვის) და ჩეხური ორგანიზაციის - People in Need თანადაფინანსებით შეძლეს. ფინანსური მხარდაჭერა გულისხმობდა ღვინის წარმოებისათვის აუცილებელი მაღალი ხარისხის აღჭურვილობების შეძენას, როგორებიცაა: უჟანგავი ფოლადის რეზერვუარი პნევმატური ხუფით; ბოთლის ავტომატური დამხუფავი; ვენახის, ხეხილის და ბოსტნეულის შესაწამლი აპარატი (ტრაქტორზე მოსაკიდებელი, მოცულობა 400 ლიტრი); ბოთლის სტერილიზატორი; უჟანგავი ფოლადის ავტომატური ღვინის ჩამომსხმელი; უჟანგავი ფოლადის ღვინის დასადუღებელი/შესანახი რეზერვუარი (მოცულობა 5,5 ტონა); ყურძნის ელექტრო წნეხი (ტევადობა 500 კგ.); იაპონური ტრაქტორი; ყურძნის კლერტგამცლელი საწური - უჟანგავი ფოლადის; ღვინის პომპა, ღვინის ფილტრი; ყურძნის შაქრიანობის და ღვინის სპირტიანობის საზომი – რეფრაქტომეტრი.

კოოპერატივი საზანო ექვს წევრს აერთიანებს, თერჯოლის ღვინო კი - რვას (გაზაფხულამდე მათი რაოდენობა 12-მდე გაიზრდება). იმერეთის რეგიონს, როგორც წესი, მცირე ფართობის ვენახები ახასიათებს. ერთ-ერთი, სწორედ, ეს გახდა მევენახეების კოოპერატივებად გაერთიანების მიზეზი. Enpard-ისა და People in Need-ის დახმარებით, მევენახეებს მიეცათ საკუთარი ყურძნის ღვინოდ გადამუშავებისა და მეღვინეობის ბიზნესის განვითარების რეალური შესაძლებლობა. კოოპერატივების საკუთრებაში, ცალკეული ვენახების გარდა, არის თითო მარანი, სადაც ისინი მოსავალს გადაამუშავებენ, ღვინოს ბოთლებში ასხამენ და ეტიკეტირების პროცესს წარმართავენ. კოოპერატივებმა  მარნების კეთილმოწყობა საკუთარი რესურსებით შეძლეს, სადაც ისინი უკვე მასპინძლობენ ტურისტებს.

საზანოს აქტივშია ვენახები, რომელთა ჯამური ფართობი 3.5-4 ჰა-ს შეადგენს. თერჯოლის ღვინოებში კი თითო წევრი, დაახლოებით, 0.5 ჰა-ს ფლობს. საერთო ჯამში მათი ვენახებიც, დაახლოებით, 4 ჰა-ს უდრის. ორივე შემთხვევაში, ვენახებს ორგანული მეთოდებით უვლიან, რაც გულისხმობს ვაზთან მხოლოდ კონტაქტური პრეპარატების გამოყენებას. მათ მიერ წარმოებული ღვინოებიც ბუნებრივი, ორგანული პრინციპებითაა დაყენებული - დანამატების გარეშე. მარნების მთავარი აქცენტია იმერული ჯიშები - ციცქა, ცოლიკოური, ოცხანური საფერე, ალადასტური და ქვევრში ღვინის დაყენების იმერული მეთოდი. 

კოოპერატივ საზანოს თავმჯდომარე, გივი ჩუბინიძე ღვინის საინფორმაციო ცენტრთან საუბარში ამბობს: „ჩვენი სურვილი იყო ქვევრში ღვინის წარმოების იმერული მეთოდის პოპულარიზაცია. კოოპერატივის პირველი პროდუქცია უკვე იანვრიდან გვექნება. ამის შემდეგ აქტიურად ჩავერთვებით გამოფენებშიც და წარმოდგენილი ვიქნებით ბაზარზეც. ღვინოს ვარქმევთ ძუსისპირულს. ზოგიერთმა შეიძლება, ეს სახელი არ იცოდეს, თუმცა ამპელოგრაფიაში თუ ჩავიხედავთ, ვნახავთ, რომ მდ. ძუსის ხეობა არის საუკეთესო ციცქის ჯიშის საწარმოებლად.“

გივი ჩუბინიძე განათლებით ეკონომისტია. როგორც გვიხსნის, მისი წინაპრები მეღვინეობით იყვნენ დაკავებულები. კერძოდ, დიდი ბაბუა სოლომონ მეორის მეღვინეთუხუცესი იყო და ამის გამო მის შთამომავლებს სოფელში „მემარნეებად“ მოიხსენიებენ. ღვინოს ოჯახში ყოველთვის აწარმოებდნენ, თუმცა ამ საქმით ბიზნესის წარმოწყებაზე არ უფიქრიათ, რადგან ღვინის წარმოება საკმაოდ დიდ საწყის ინვესტიციებს საჭიროებდა. აღნიშნულმა პროგრამამ კი მასა და მის თანასოფლელებს საშუალება მისცა, მეღვინეობა მათი შემოსავლის მნიშვნელოვანი წყარო გახდეს. კოოპერატივ საზანოს ქვევრები როგორც მარანში, ასევე, ღია ცის ქვეშ აქვს, იმერული წესისამებრ. 

მარნის ეზოში მცირე საჩვენებელი ვენახია, საინტერესო და ორიგინალური კონცეფციით - ვენახის ფართობი საქართველოს რუქის გარშემოწერილობას იმეორებს და ვაზიც ისეა განაწილებული ამ ტერიტორიაზე, როგორც საქართველოს კუთხეებში - აბორიგენული ჯიშები. ამ პატარა ვენახში საზანოს 136 ქართული ჯიში აქვს შეკრებილი. 

გოგიტა მაკარიძეს ღვინის ბიზნესში გარკვეული გამოცდილება უკვე აქვს. მან თავისი მეგობრის, მეღვინე რამაზ ნიკოლაძისა და ბიომეურნეობათა ასოციაცია ელკანას რეკომენდაციებით, 2009 წელს გააშენა ვენახი, რომელიც იშვიათი იმერული ჯიშის - ოცხანური საფერეს 4 000 ძირს აერთიანებდა. ამ ვენახებიდან მოწეული მოსავლით ნატურალური პრინციპებით წარმოებულ საფერეს გოგიტა მაკარიძე ყოველწლიურად ექსპორტზე აგზავნიდა, იაპონიაში 1 000 ბოთლს, ხოლო აშშ-ში - 700 ბოთლს.  

„რთველს მომავალ კვირაში ვიწყებთ. ველოდებით, დაახლოებით, 7-8 ტონა მოსავალს.  წელს როგორც მინიმუმ, 3 000 ბოთლს ჩამოვასხამთ, რაღაც ნაწილს კი - დავაძველებთ. მაგალითად, ოცხანურ საფერეს დავაძველებთ მუხაში.“ - ამბობს კოოპერატივ თერჯოლის ღვინის დირექტორი - გიორგი (გოგიტა) მაკარიძე. 

© საქართველოს ღვინის კლუბი, ღვინის საინფორმაციო ცენტრი

 



მოგესალმებით, მაინტერესებს იბარებთ თუ არა ყურძენს „ციცქას“? რა ფასში და სად შეიძლება მოტანა?


მოგესალმებით, გთხოვთ მომწეროთ, ჩაიბარებთ თუ არა ყურძენს „ციცქას“, რა ფასში და სად შეიძლება მოტანა

თქვენი კომენტარი

თქვენი ელ-ფოსტა არ გამოქვეყნდება
  • Web page addresses and e-mail addresses turn into links automatically.
  • No HTML tags allowed

More information about formatting options

საქართველოს ღვინის რუკა
თქვენ შეგიძლიათ დაეხმაროთ ჩვენს ბლოგს "PayPal"-ის საშუალებით.

ტოპ ხუთეული