ჩინეთში ღვინის საინვესტიციო ფონდი შეიქმნა

ჩინეთის მთავრობამ მხარი დაუჭირა ქვეყანაში პირველი საინვესტიციო ფონდის შექმნას, რომელიც ღვინის წარმოების მხარდასაჭერად შეიქმნება. ფონდი,  რომელსაც სახელად Dinghong ეწოდება, ჩინელმა ბანკირმა და ღვინის დიდმა დამფასებელმა - ლინგ ჩიიციუნმა ჩამოაყალიბა. ფონდი აპირებს 5 წლის განმავლობაში 110 მილიონი ევროს ინვესტირებას ბორდოულ კომპანია Vintex & les Vignobles Grégoire-სთან თანამშრომლობისთვის. სწორედ ამ კომპანიას დაეკისრება ჩინური ორგანიზაციისთვის ღვინის შესყიდვა. ფონდი წელსვე შეუდგება მუშაობას და ღვინის შესაძენად ყოველწლიურად 22 მილიონ ევროს გამოყოფს. ჩინელები აპირებენ შეისყიდონ როგორც ბორდოული, ისე ბურგუნდიული ღვინოები. აღსანიშნავია, რომ თანხის 60% უკვე გაყიდვაში გამოსული ღვინოების შესაძენად დაიხარჯება, ხოლო დანარჩენი 40% - ე.წ. en primeurღვინოების, ანუ ისეთი ღვინოების შესაძენად, რომლებიც ჯერ ბოთლებში ჩამოსხმული არ არის. ფონდში მინიმალური შესატანი კომპანიებისთვის 1 მილიონ ევროს, ხოლო ფიზიკურ პირთათვის - 100 ათას ევროს შეადგენს. Vintex & les Vignobles Grégoire-ს წარმომადგენლის განცხადებით, ღვინის ბიზნესში უკვე არაერთი ჩინური კომპანიაა ჩართული, მაგრამ მათი ორგანიზაცია უსაფრთხოების დამატებით გარანტიებს იძლევა, რადგან ღვინის შესყიდვა მსხვილ პარტიებად, ოფიციალური ფონდის მეშვეობით მოხდება. ფონდი  საგანმანათლებლო ფუნქციების შეთავსებასაც აპირებს - მისი მესვეურების განცხადებით, ბორდოს ვენახებში მოეწყობა ჩინელ ბიზნესმენთა ვიზიტები, ჩინეთში კი, ევროპელ მეღვინეთა მონაწილებით, მათთვის მასტერ-კლასების ჩატარება იგეგმება.

© ღვინის კლუბი/Weekend