ევროპელ მეღვინეებს წელს ყურძენი შემოაკლდებათ

გვალვამ და სეტყვამ ზაფხულში და ყინვიანმა ზამთარმა სამხრეთ ევროპის ვენახები სერიოზულად დააზარალა. ზარალი იმდენად დიდი აღმოჩნდა, რომ ექსპერტების აზრით, წლევანდელი მოსავალი უკანსკნელი 40-50 წლის განმავლობაში ყველაზე ცუდი იქნება. მათი პროგნოზებით, ყურძნის მოსავალი საფრანგეთში შარშანდელზე დაახლოებით 20%-ით ნაკლები იქნება, ამასთან, ყველაზე უფრო დაზარალებულ მხარედ შამპანი და ბურგუნდია დასახელდნენ. იტალიაში შარშანდელთან შედარებით 7-პროცენტიანი დანაკლისია მოსალოდნელი, თუმცა აქამდე ყველაზე ცუდად სწორედ შარშანდელი წელი ითვლებოდა.  ევროპაში, სადაც მსოფლიო ღვინის თითქმის 2/3 იწარმოება, მეღვინეობისა და ღვინის გაყიდვების შედეგად მიღებულ შემოსავალს დაახლოებით 2,5 მილიონი ოჯახი იღებს. ანალიტიკოსები გვაფრთხილებენ, რომ რეკორდულად დაბალი მოსავლიანობის გამო ღვინის მცირე მეურნეობების არსებობა შეიძლება საფრთხის წინაშე დადგეს. პროგნოზების თანახმად, შამპანური ღვინის წარმოება წელს შეიძლება 40%-ით, ბოჟოლეს 30%-ით, ბორდოს კი - 10%-ით შემცირდეს. ზოგიერთი ვენახი უამინდობამ ისე დააზარალა, რომ ადგილობრივმა მევენახეებმა სულაც უარი თქვეს 2012 წლის ღვინის დაყენებაზე. ღვინის წარმოების მოცულობის შემცირება მთლიანობაში, როგორც ჩანს,  ფასების გაზრდას გამოიწვევს. თუმცა რამდენად მნიშვნელოვანი იქნება ეს ცვლილება, ჯერ ძნელი სათქმელია. არის კარგი ამბებიც - ექსპერტების აზრით, იქ, სადაც მევენახეებმა ასე თუ ისე მოსავლის აღება შეძლეს, ყურძენი ბევრად უფრო უკეთ დამწიფდა, ვიდრე ეს ჩვეულებრივ ხდებოდა, რაც იმას ნიშნავს, რომ წლევანდელი მოსავლის ღვინო საკმაოდ ხარისხიანი იქნება.

© ღვინის კლუბი/Weekend