გამოქვეყნებულია: 17 აპრილი, 2013 - 13:58
იაპონიაში სამი დღის განმავლობაში მიმდინარეობდა კონკურსი, რომელსაც მსოფლიოს საუკეთესო სომელიე უნდა გამოევლინა. საბოლოოდ, კონკურსის გამარჯვებულად შვეიცარიელი პაოლო ბასო დასახელდა. დაჯილდოების საზეიმო ცერემონიას თვალს ათასობით მაყურებელი ადევნებდა და პირდაპირი ეთერითაც გადაიცემოდა. ბასოსთან ერთად ფინალში კანადელი და ბელგიელი სომელიეებიც გავიდნენ, თუმცა, ქალაქ ვაკალოში (შვეიცარიის სამხრეთი, ტიჩინოს კანტონი), სასტუმრო Conca Balla-ში მიღებული გამოცდილების წყალობით ბასომ მათი დაჯაბნა მაინც შეძლო. მსოფლიოს საუკეთესო სომელიეს ტიტული, რომელიც ამჯერად 47 წლის შვეიცარიელს ერგო, მანამდე 2010 წლის კონკურსის გამარჯვებულს, ბრიტანელ ჟერარ ბასეტს ეკუთვნდა. მსოფლიოს საუკეთესო სომელიეს კონკურსი პირველად 1969 წელს ჩატარდა და წელს უკვე მეთოთხმეტედ გაიმართა. წელს კონკურსში მონაწილეობას 54 ქვეყნის წარმომადგენელი იღებდა – ავსტრალიიდან, ბრაზილიიდან, ინდონეზიიდან, შვედეთიდან და აშ. თითოეულ მონაწილეს სამი დღის განმავლობაში უნდა დაემტკიცებინა ჟიურისათვის, რომ კონკრეტულ კერძთან ღვინის საუკეთესოდ შერჩევა სწორედ მას ეხერხება და მომთხოვნი კლიენტების სურვილებსაც სწორედ ის დააკმაყოფილებს ყველაზე უკეთ. “კარგი სომელიე მხოლოდ ღვინის შეცნობის ოსტატი კი არ უნდა იყოს, არამედ მისი მოვალეობაა, კლიენტს დაეხმაროს და ასწავლოს, თუ როგორ მიიღოს სიამოვნება შერჩეული ღვინითა და კერძით,” – განმარტა კონკურსის ჟიურის წევრმა და ექს-გამარჯვებულმა სერჟ დაბსმა.
© ღვინის კლუბი/Weekend
თემა:
ბეჭდვა
თქვენი კომენტარი