წვნიანი ლიმონის სორგოთი

საჭირო მასალა: 40 გ ნედლი ჯანჯაფილი, 1 ცალი ცხარე წითელი წიწაკა, 3 ღერი ლიმონის სორგო (ლემონგრასი), 1 ს.კ. ზეთი, 600 მლ ბოსტნეულის ბულიონი, 1 კბილი ნიორი, 5 ცალი ქამა სოკო, 4 ღერი ქინძი, 1 ცალი ლაიმი ან ლიმონი, 2 ს.კ. ტაილანდური თევზის სოუსი, 200 გ კალმახის ფილე, მარილი – გემოვნებით

მომზადება: ჯანჯაფილი მსხვილად დავჭრათ. საშუალო ზომის ნაჭრებად დავჭრათ ლიმონის სორგო. წიწაკა შუაზე გავჭრათ და თესლი ამოვაცალოთ. ტაფაზე გავაცხელოთ ზეთი, დავუმატოთ ლიმონის სორგო და 1 წუთის განმავლობაში ვშუშოთ. შემდეგ დავუმატოთ ნახევარი წიწაკა და ჯანჯაფილი, ბულიონი და 20 წუთის განმავლობაში ვხარშოთ. დარჩენილი ჯანჯაფილი და წიწაკა, სოკო და ნიორი ძალიან თხლად დავჭრათ. ნახარში საცერზე გადავწუროთ. თევზის სოუსს შევურიოთ 2 ს.კ. ლაიმის ან ლიმონის წვენი და წამოვადუღოთ გადაწურულ ბულიონთან ერთად. დავუმატოთ მომზადებული ჯანჯაფილი, ნიორი, სოკო, წიწაკა, 1 სმ ზომის ნაჭრებად დაჭრილი თევზი, მარილი და  3-4 წუთის განმავლობაში, თავდახურული, დაბალ ცეცხლზე ვადუღოთ. ბოლოს მოვაყაროთ ქინძის ფოთლები.

© ღვინის კლუბი/Weekend