ქართული ბიოღვინო გერმანულ ბაზარზე გადის

გერმანელ ბიზნესმენთა ჯგუფი ქართული ბიოღვინით დაინტერესდა. "საფერავი", რომელსაც ფერმერი გივი ნიკოლაშვილი კახეთში აწარმოებს,  ტრადიციული მეთოდებით, ქიმიური დანამატების გარეშეა დამზადებული. 19-21 თებერვალს გერმანიაში, ბიოპროდუქტების საერთაშორისო გამოფენაზე ეს პროდუქტი ბიოლოგიურ მეურნეობათა ასოციაცია "ელკანამ" წარადგინა. დღეს კი, გერმანელებმა უკვე 300 000 ბოთლის ყიდვის სურვილი გამოთქვეს.

ბიოღვინის წარმოება გარკვეული წესების დაცვას მოითხოვს. საერთაშორისო სტანდარტებით, ვენახები, საიდანაც ორგანული ღვინო იწარმოება, სამრეწველო ობიექტებისგან მოშორებით, ეკოლოგიურად სუფთა ტერიტორიაზე უნდა იყოს გაშენებული. ნიკოლაშვილის ვენახები გურჯაანში, ექვს ჰექტარზეა გაშენებული და ამ სტანდარტების ყველა კრიტერიუმს აკმაყოფილებს. კერძო მეწარმეს ღვინის წარმოების მთელ პროცესში კონსულტაციებს უწევდა საქართველოს ბიოლოგიურ მეურნეობათა ასოციაცია "ელკანა." უნდა აღინიშნოს, რომ გივი ნიკოლაშვილის "საფერავი" პირველი სერთიფიცირებული ბიოღვინოა საქართველოში. ნიურნბერგში წარმოდგენილი იყო ასევე მეორე ფერმერის, ვაჟა დარჩიაშვილის "საფერავი განსაკუთრებული", რომელიც ამჟამად სერთიფიცირების პროცესშია.

"ბიოფახი" ნიურნბერგში უკვე ოცი წელია იმართება. ნიკოლაშვილის "საფერავი" პირველი ბიოღვინოა საქართველოდან, რომელიც ამ გამოფენაზე გავიდა და მნიშვნელოვანია, რომ მან უკვე მიიპყრო უცხოელთა ყურადღება. უახლოეს მომავალში ქართველი ფერმერი "მანავის მარნის" ღვინის ქარხანაში საექსპორტო პროდუქციის პირველი პარტიის ჩამოსხმას აპირებს.