წელიწადი არ გავა ისე, თბილისში ღვინის ახალი მაღაზია ან ბარი რომ არ გაიხსნას, თუმცა, საქართველოში ჩამოსული უცხოელები, პრივატულ საუბრებში ხშირად აღნიშნავენ, რომ დედაქალაქში აქამდე არ იყო ადგილი, სადაც მხოლოდ ნატურალური და ე.წ. ”ბიო” ღვინის შეძენა და დაგემოვნება იქნებოდა შესაძლებელი. ამიერიდან, ქართველ და უცხოელ ღვინის ყველაზე პრეტენზიულ მოყვარულებსაც კი, საშუალება მიეცემათ, მცირე ოჯახური მარნების მიერ წარმოებული ნატურალური ღვინით ისიამოვნონ.
ხუთაშაბათს, დღის 12 საათზე, თბილისში, გალაკტიონ ტაბიძის ქუჩის 15 ნომერში მდებარე სარდაფში, ღვინის მაღაზია-ბარი ”ღvino underground”-გაიხსნება. ბარში ნატურალური ღვინის გარდა, ღვინის მოყვარულებს შეეძლებათ საქართველოში წარმოებული მრავალი სახის ყველის, ჩურჩხელას, ნიგვზის, რაჭული ლორის და სხვა ქართული ნუგბარის გასინჯვა. ბარის შემქნელმა შვიდმა მეღვინემ (მალხაზ ჯაყელი, ჯონ ვურდემანი, სოლომონ ცაიშვილი, რამაზ ნიკოლაძე, ნიკა ბახია, ნიკი ანთაძე, კახა ბერიშვილი) თავიდანვე ნატურალური ღვინისაკენ აიღეს გეზი, შესაბამისად, ”ღvino underground”-ში მხოლოდ ისეთი ღვინო გაიყიდება, რომელიც ნატურალური მევენახეობა-მეღვინეობის სტანდარტებს აკმაყოფილებს. მაღაზია-ბარში წარმოდგენილი იქნება საქართველოს თითქმის ყველა კუთხის მეღვინეების მიერ წარმოებული ღვინოები, რომელთა შეძენაც აქამდე ერთ ლოკალურ სივრცეში ფაქტობრივად შეუძლებელი იყო.
”ღvino underground”-ი თბილისში მდებარე სხვა ღვინის დაწესებულებებისაგან იმითაც იქნება განსხვავებული, რომ იქ არ გაიყიდება მწვადი, ხინკალი, ოსტრი, ყაურმა და ა.შ.: ”ჩვენს ბარში ადამიანი პირველ რიგში საინტერესო ღვინის გასასინჯად უნდა შემოვიდეს” – ამბობს ბარის მენეჯერი, მეღვინე რამაზ ნიკოლაძე. აღსანიშნავია, რომ ახლადგასხნილ მაღაზია-ბარში ღვინო ბოთლის გარდა, ჭიქითაც გაიყიდება.
© ღვინის კლუბი/vinoge.com
ბეჭდვა
მშვენიერი პირველი დღე იყო, ხვავიანი, ბარაქიანი :) ასე თუ გაგრძელდა, მალე გამოილევა ნატურალური ქართული ღვინო :))
თქვენი კომენტარი