საფერავს, როგორც ქართული ღვინის ერთ-ერთ ყველაზე ცნობილ და ხასიათიან სახეს, ოქტომბერში საერთაშორისო ღვინის სამყაროს კიდევ ერთი მნიშვნელოვანი ფიგურა შეაფასებს. Saperavi International 2026-ის ჟიურის თავმჯდომარე ბრიტანელი ღვინის ჟურნალისტი და მწერალი ენდრიუ ჯეფორდი იქნება. საერთაშორისო კონკურსი საქართველოში 17–18 ოქტომბერს გაიმართება.
ენდრიუ ჯეფორდი ღვინის შესახებ თითქმის ოთხი ათწლეულია წერს. მისი პროფესიული გზა 1988 წელს დაიწყო და მას შემდეგ ჯეფორდის ტექსტები არაერთ მნიშვნელოვან ბრიტანულ გამოცემაში გამოქვეყნდა. დღეს ის Decanter-ის ავტორი და რედაქტორია და ღვინის საერთაშორისო სამყაროში ერთ-ერთ გამოცდილ და ცნობად ავტორად ითვლება. მისი საქმიანობა მხოლოდ ღვინის მწერლობას არ უკავშირდება, წლების განმავლობაში ის სხვადასხვა საერთაშორისო ღვინის კონკურსის ჟიურიშიც მონაწილეობდა და ღვინოების შეფასების პროცესში მნიშვნელოვანი პროფესიული გამოცდილება დააგროვა.
საქართველო ჯეფორდის პროფესიული ინტერესის სფეროში არაერთხელ მოხვედრილა. ქართული ღვინის, ადგილობრივი ვაზის ჯიშებისა და ქვეყნის მეღვინეობის განვითარების შესახებ მისი წერილები Decanter-შიც გამოქვეყნებულა. ამდენად, Saperavi International-ში მისი ჩართულობა ქართული ღვინის მიმართ უკვე არსებული პროფესიული ინტერესის გაგრძელებაა.
წლევანდელი კონკურსი სწორედ საფერავის მრავალფეროვნებასა და მის საერთაშორისო პერსპექტივებზე გაამახვილებს ყურადღებას. სხვადასხვა ღვინის შეფასებასთან ერთად, ღონისძიება კიდევ ერთი შესაძლებლობა იქნება იმის საჩვენებლად, თუ როგორ შეიძლება ერთი ადგილობრივი ჯიში სხვადასხვა მეღვინეობის, რეგიონისა და სტილის ფარგლებში განსხვავებულად გამოიხატოს.
© ღვინის კლუბი/vinoge.com
ბეჭდვა
თქვენი კომენტარი