7 დეკემბერს ღვინის ფესტივალი „არაჩვეულებრივი გამოფენა“ , რომელიც მცირე საოჯახო მარნებისა და მათი პროდუქციის წარდგენაზე იქნება ორიენტირებული, წელს ქუთაისში, სასტუმრო „რჩეული პალასში“ გაიმართება. ფესტივალზე მოსულ სტუმრებს შესაძლებლობა ექნებათ გაეცნონ დასავლეთ საქართველოს ვაზის ჯიშებისგან დამზადებულ ღვინოებს, რომლებიც ფესტივალამდე სპეციალური დეგუსტაციით შეირჩევა.
ღონისძიების მიზანია ნაკლებად ცნობილ, მცირე მარნებს მისცეს ფართო აუდიტორიის წინაშე წარმოჩენის შანსი.
„არაჩვეულებრივ გამოფენას“ წელს სხვადასხვა სფეროს წარმომადგენლები დაესწრებიან: ღვინის მწერლები, სომელიეები, იმპორტიორები, ტურიზმისა და გასტრონომიის სფეროში მომუშავე ადამიანები, ასევე ღვინის მოყვარულები. ასეთი შეხვედრები ხელს უწყობს როგორც მარნების ცნობადობას, ისე პროფესიულ და საინფორმაციო ურთიერთობების გამყარებას.
„არაჩვეულებრივი გამოფენა“ მათთვისაა, ვისაც სურს მეტი გაიგოს რეგიონული ღვინოების შესახებ და გაიცნოს ახალი მარნები და მეღვინეები.
© ღვინის კლუბი/vinoge.com
ბეჭდვა
თქვენი კომენტარი