ღვინის ეროვნული სააგენტოსა და საფრანგეთში საქართველოს საელჩოს მხარდაჭერით, ქართული ღვინო მიმდინარე თვეში პარიზში ორ მნიშვნელოვან საერთაშორისო გამოფენაზე იყო წარმოდგენილი.
ბუნებრივი ღვინოების საერთაშორისო გამოფენაში „RAW Wine Paris” ქვევრის ღვინის მწარმოებელი 9 მარანი მონაწილეობდა, ხოლო ღვინისა და ალკოჰოლიანი სასმელების მასშტაბურ საერთაშორისო გამოფენაზე „Wine Paris“ ქართული ღვინის მწარმოებელი 30-მდე კომპანიის პროდუქცია იყო წარმოდგენილი.
„Wine Paris“ მსოფლიო მასშტაბით ერთ-ერთი ყველაზე მნიშვნელოვანი გამოფენაა ღვინის ინდუსტრიაში, სადაც, ტრადიციულად, ათასობით ვიზიტორთან ერთად, თავს იყრიან ღვინის პროფესიონალები, იმპორტიორები და მედიის წარმომადგენლები.
ღვინისა და ალკოჰოლიანი სასმელების ასევე ერთ-ერთი გამორჩეული საერთაშორისო გამოფენაა „RAW Wine”, სადაც მაღალი ხარისხის ბუნებრივი, ორგანული და ბიოდინამიური ღვინოების მწარმოებლები იკრიბებიან.
გამოფენების დროს, სააგენტოს ხელმძღვანელებმა შეხვედრები გამართეს საერთაშორისო მარკეტინგული კომპანიების წარმომადგენლებთან. ქართულ სტენდს ესტუმრა OIV-ის პრეზიდენტი ჯონ ბარკერი, რომელმაც ღვინოები დააგემოვნა.
ლევან მეხუზლას თქმით, პარიზში გამართულ გამოფენებს ქართველი მეღვინეებისთვის დიდი მნიშვნელობა აქვს – ახალი კონტაქტები დაგვეხმარება ექსპორტის ზრდასა და სავაჭრო პარტნიორების მოზიდვაში. სააგენტო წელსაც გააგრძელებს მწარმოებლების მხარდაჭერას საერთაშორისო გამოფენებზე.
© ღვინის კლუბი/vinoge.com