დიდი ბრიტანეთის ბაზარზე ქართული ღვინის ცნობადობის გაზრდისა და საექსპორტო პოტენციალის გაძლიერების მიზნით, ლონდონში ქართული ღვინის დეგუსტაცია The New Natural გაიმართა. ღონისძიება ღვინის ეროვნული სააგენტოს ინიციატივითა და მისი კონტრაქტორი კომპანიის Swirl Wine Group ორგანიზებით ჩატარდა.
დეგუსტაციას უძღვებოდა მსოფლიოში ცნობილი ბრიტანელი ღვინის მაგისტრი სარა ებოტი, ხოლო ქართული ღვინის მრავალფეროვნება პროფესიულ აუდიტორიას ბრიტანელმა სომელიემ, რესტორატორმა და ბუნებრივი ღვინის ამბასადორმა ჰანი სპენსერმა გააცნო.
ღონისძიების ფარგლებში სტუმრებს შესაძლებლობა ჰქონდათ, გაცნობოდნენ ქართული ღვინის მწარმოებელი 10 კომპანიის სხვადასხვა სახეობის ღვინოს, რაც კიდევ ერთხელ წარმოაჩენს ქართული მეღვინეობის მრავალფეროვნებასა და უნიკალურობას.
ღვინის ეროვნული სააგენტოს მხარდაჭერით, 2026 წელს დიდ ბრიტანეთში ქართული ღვინის მარკეტინგულ კამპანიას კომპანია Swirl Wine Group ახორციელებს. კამპანია მოიცავს დეგუსტაცია-სემინარებს ბრიტანეთის სხვადასხვა ქალაქში, საერთაშორისო გამოფენებში მონაწილეობას, ასევე მიზნობრივ სარეკლამო და მედია აქტივობებს, რაც ქართული ღვინის პოპულარიზაციასა და ბაზარზე პოზიციების განმტკიცებას ემსახურება.
© ღვინის კლუბი/vinoge.com
ბეჭდვა
თქვენი კომენტარი