ინგლისელი მეღვინეების უმრავლესობა აცხადებს, რომ წლევანდელ მოსავალს მხოლოდ ცხელი შემოდგომაღა თუ იხსნის. უკვე ცხადია, რომ ბრიტანელები ყურძნის იმაზე ნაკლებ მოსავალს აიღებენ, ვიდრე აქამდე ვარაუდობდნენ და რთველიც ჩვეულებრივზე მინიმუმ ორი კვირით გვიან დაიწყება. იმის მიუხედავად, რომ წვიმამ და სიცივემ ვენახები საგრძნობლად აზარალა, ოპტიმისტებიც არსებობენ. მაგალითად, თომას შოუ, გლოსტერშირის მეურნეობა Three Choirs Vineyard–ის დირექტორი მიიჩნევს, რომ აგვისტოში ყურძნის დამწიფებისათვის საჭირო პირობები, ასე თუ ისე, მაინც შეიქმნა. ავდრისა და მაღალი ტენიანობის გამო ყურძნის მტევანიცა და მარცვალიც ბევრად მცირე ზომის იქნება, რამაც, შეიძლება, ყურძენი კიდევ უფრო მეტად არომატული გახადოს. ასე რომ, თომას შოუს საინტერესო ღვინოების დაყენების დიდი იმედი აქვს. სასექსში მდებარე მეურნეობა Ridge View-ის წარმომადგენელი მარდი რობერტსი ასევე ოპტიმისტურად არის განწყობილი. ,,მოსავლიანობა წელს დაბალია, თუმცა გადარჩენილი ყურძნისგან შეიძლება ძალიან კარგი, ხილის არომატებით გაჯერებული ღვინოები მივიღოთ”, - განაცხადა მან.
© ღვინის კლუბი/vinoge.com
ბეჭდვა
თქვენი კომენტარი