ღვინის ეროვნული სააგენტოს ფინანსური მხარდაჭერითა და მისი პარტნიორი მარკეტინგული კომპანიის, „Red Bridge“-ის ორგანიზებით, იაპონიაში ქართული ღვინის პოპულარიზაციის კიდევ ერთი მნიშვნელოვანი ღონისძიება გაიმართა. მიაგის პრეფექტურის ადმინისტრაციულ ცენტრში, ქალაქ სენდაიში, ჩატარდა დეგუსტაცია-სემინარი, სადაც დამსწრე საზოგადოებას ქართული ღვინის მრავალფეროვნება და უნიკალური ხასიათი გააცნეს.
აღნიშნული ღონისძიება წარმოადგენს ე.წ. „Road Show“-ს ნაწილს, რომელიც 7-13 აპრილის პერიოდში იაპონიის რამდენიმე დიდ ქალაქში — საპოროში, სენდაისა და ტოკიოში იმართება. მსგავსი ფორმატის შეხვედრები მიზნად ისახავს ქართული ღვინის ცნობადობის გაზრდას და ადგილობრივი ბაზრის წარმომადგენლებისთვის მისი უკეთ გაცნობას.
სენდაიში გამართულ სემინარს უძღვებოდა „Red Bridge“-ის ხელმძღვანელი, ღვინის მაგისტრი კენიჩი ოჰაში, რომელმაც დამსწრეებს ქართული მეღვინეობის შესახებ დეტალური პრეზენტაცია წარუდგინა. პრეზენტაციაში ყურადღება გამახვილდა საქართველოს მრავალსაუკუნოვან ღვინის კულტურაზე, ტრადიციულ მეთოდებზე, ვაზის ძირითად ჯიშებზე და თანამედროვე ინდუსტრიის განვითარების დინამიკაზე.
იაპონური ბაზარი განსაკუთრებით მაღალი ხარისხის პროდუქციაზეა ორიენტირებული და მომხმარებლები სულ უფრო მეტად ეძებენ გამორჩეულ, ავთენტურ გემოვნურ გამოცდილებებს. სწორედ ამიტომ, მსგავსი ღონისძიებები მნიშვნელოვანი ინსტრუმენტია როგორც ექსპორტის ზრდისთვის, ასევე წარმოების ხარისხისა და მარკეტინგული მიდგომების დახვეწისთვის. გრძელვადიან პერსპექტივაში ეს პროცესი ხელს უწყობს ქართული ღვინის პოზიციების გამყარებასა და კონკურენტუნარიანობის ზრდას საერთაშორისო ბაზარზე.
© ღვინის კლუბი/vinoge.com
ბეჭდვა
თქვენი კომენტარი