14 თებერვალს ბათუმი ბუნებრივი ღვინისა და მუსიკის ფესტივალს — SUPERNATURAL — უმასპინძლებს. ღონისძიება Warehouse-თან კოლაბორაციით, სივრცე ROOMS Batumi-ში ჩატარდება და გააერთიანებს ღვინისა და მუსიკის მოყვარულებს.
SUPERNATURAL ფესტივალზე წარმოდგენილი იქნება 50 ნატურალური მარანი საქართველოს ყველა რეგიონიდან. სტუმრებს შესაძლებლობა ექნებათ დააგემოვნონ როგორც კარგად ცნობილი, ასევე ახალი, ძველი და იშვიათი ქართული ვაზის ჯიშებიდან დამზადებული ღვინოები. ფესტივალის მთავარი მიზანია ბუნებრივი ღვინის კულტურის პოპულარიზაცია და მეღვინეებსა და მომხმარებლებს შორის პირდაპირი დიალოგის ხელშეწყობა.
ღონისძიების ფარგლებში გაიმართება Wine Talks-ის სერია — საგანმანათლებლო ლექციები და დისკუსიები ღვინის თემატიკაზე, სადაც დამსწრეებს შესაძლებლობა ექნებათ მოუსმინონ საერთაშორისო და ქართველ ექსპერტებს, ასევე პირადად გაესაუბრონ ფესტივალის მონაწილე მეღვინეებს.
Wine Talks-ის პროგრამა 14:00 საათზე დაიწყება და მოიცავს შემდეგ თემებს:
- „ქართული ღვინო მსოფლიო რუკაზე“ — ჯონ ვურდემანია
- „ზღვის გავლენა ბუნებრივ ღვინოზე“ — ორიოლ არტიგასი (ესპანეთი)
- „8000 წელი ერთ წიპწაში: ღვინის უძველესი კვალი“ — არქეოლოგი გიორგი ბიძინაშვილი
- „ქართული ღვინის მრავალფეროვნება და პერსპექტივები“ — მადს კლეპე (ნორვეგია)
15:00 საათიდან ფესტივალი გადაინაცვლებს დეგუსტაციის ნაწილზე, სადაც სტუმრებს შესაძლებლობა ექნებათ დეტალურად გაეცნონ სხვადასხვა მარნის ფილოსოფიასა და სტილს.
დღის დასკვნით ეტაპზე, 17:00 საათიდან, SUPERNATURAL მუსიკალურ სივრცედ გადაიქცევა. სცენაზე წარდგებიან Zurkin, Nika J და verb.2702, ხოლო მუსიკალურ განწყობას SKAZZ შექმნის. მუსიკალური პროგრამა ორგანულად ერწყმის ფესტივალის კონცეფციას და ბუნებრივი ღვინის თავისუფალ, ექსპერიმენტულ და ცოცხალ ხასიათს უსვამს ხაზს.
© ღვინის კლუბი/vinoge.com
ბეჭდვა
თქვენი კომენტარი