ღვინის ქართული კომპანიები უკრაინის ბაზარზე გაყიდვების შემცირების შემდეგ აქცენტებს ალტერნატიული ბაზრების მიმართულებით აძლიერებენ. როგორც რადიო ``კომერსანტს`` ღვინის კომპანია “თბილღვინოდან” აცნობეს, მიმდინარე თვის ბოლოს აზერბაიჯანში ქართული ღვინის ექსპორტს განაახლებენ.
კომპანიის ინფორმაციით, ხელშეკრულებას, რომელიც აზერბაიჯანის მხარესთან იყო გაფორმებული, ვადა რამდენიმე ხნის წინ გაუვიდა და ახალი ხელშეკრულების ხელმოწერის შემდეგ, ღვინის ექსპორტი ორ კვირაში ისევ დაიწყება. “თბილღვინო” აზერბაიჯანში საექსპორტოდ 15 ათასი ბოთლის გატანას გეგმავს, რომელთა ფასი ბაზარზე დაახლოებით 7 დოლარი იქნება. კომპანიამ შარშან უკრაინაში, ყაზახეთში, ბელორუსიაში, ლიტვაში, ლატვიაში, ინგლისსა და საფრანგეთში ექსპორტზე მილიონ 40 ათასი ბოთლი ღვინო გაიტანა და წელსაც იგივე რაოდენობის გატანას გეგმავს. “თბილღვინო” 40-მდე დასახელების ღვინოს აწარმოებს და მათი ფასი ქართულ ბაზარზე 3-დან 37 ლარამდე მერყეობს.
რადიო “კომერსანტი”
