ავსტრალიის ღვინის კვლევითი ინსტიტუტის თანამშრომელი, დოქტორი პოლ ჩამბერსი აპირებს ღვინის ახლებური საფუარის შექმნას, რომელმაც ნაკლები შაქარი და ალკოჰოლი უნდა გადაამუშავოს. ჩამბერსი ამბობს, რომ ავსტრალიურ ღვინოებში ალკოჰოლის მაღალი მაჩვენებელია. ამას თავისი მიზეზი აქვს: ვაზზე ნაყოფს დიდხანს ტოვებენ, რომ მეტი არომატი მიიღონ. "თუ ოდნავ შევამცირებთ ალკოჰოლის რაოდენობას, არომატის დიდი ნაწილი უკეთ შენარჩუნდება, რადგან დიდი რაოდენობით ალკოჰოლი არომატს კლავს", - აღნიშნავს ჩამბერსი და კვლევის მიზანს ასახელებს - ესაა ღვინის ხარისხის გაუმჯობესება მასში ალკოჰოლის დონის შემცირებით.