„ნარინჯისფერი ღვინო – რატომ უნდა დავლიოთ ყველამ ეს ღვინო 2017 წელს“, ასეთი სათაურით გამოაქვეყნა 2 დღის წინ სტატია ბრიტანულმა The Independent–მა.
Orange-ის ბუმი უკვე კარგა ხანია დაიწყო და ამ სტილის ღვინოებზე, როგორც ხედავთ, უკვე არამხოლოდ სპეციალური გამოცემები, არამედ Independent–იც წერს, თანაც კარგა ხანია. ეგ კიარა, მეორე დღესვე ამ სტატიაზე დაყრდნობით ტაბლოიდმა The Sun ასევე მოამზადა პუბლიკაცია და სათაურად დაარქვა – The Future Is Orange, „ნარინჯისფერი მომავალი“, სადაც ცხადია საქართველო და ჩვენი მეღვინეობის რამდენიმეათასწლოვანი ტრადიციაცაა ნახსენები, თუმცა იქვე აღნიშნულია, რომ "ნარინჯისფერის" თანამედროვე ისტორია 2000 წლიდან იწყება, როდესაც იოშკო გრავნერმა ქართულ ქვევრებში დააყენა ამ სტილის ღვინოებიო.
მოგეხსენებათ, "ნარინჯისფერს" ჭაჭაზე და კლერტზე დავარგებულ ღვინოს უწოდებენ დასავლეთში. ჩვენ, ვინც უფრო ქარვისფერს ვუწოდებდით ასეთ ღვინოს, რა თქმა უნდა გვეღიმება სახელწოდებაზე, Orange–ზე, მაგრამ ვინ ჩივის, მთავარია, რომ ჩვენებური ქვევრის ღვინო და მისი უცხოელი თანამოძმეები სულ უფრო პოპულარული ხდებიან მსოფლიოში.
„ესაა თეთრი ღვინო, რომელიც წითელი ღვინოსავით დააყენეს, მისი განსაკუთრებული ფერი კი თეთრი ვაზის ჯიშის კანიდან მოდის, იგი დიდხანს დატოვეს წვენთან, ტანინების მისაღებად“, წერს ავტორი. სტატიაში სხვა შეფასებებსაც შევხვდებით: მაგ. „მეოთხე ღვინო“ (თეთრის, ვარდისფერისა და წითლის შემდეგ).
ასევე ხაზი ესმება იმასაც, რომ ასეთი ღვინის დაყენებისას იშვიათადად იყენებენ კულტურულ საფუარს, რომ მას გამორჩეული, განსაკუთრებული არომატები აქვს, და რომ იგი შესანიშნავად იხდენს მაროკოულ, ეთიოპურ, ინდურ, ირანულ სამზარეულოს.
იმედია მალე ასეთ ჩამონათვალებში ქართული სამზარეულოც შევა.
© საქართველოს ღვინის კლუბი, ღვინის ეროვნული სააგენტო, ღვინის საინფორმაციო ცენტრი