წლევანდელ რთველზე კახელი გლეხები ყურძნის ქარხნებში ჩაბარებას, მოსავლის საკუთარი ხელით გაყიდვას ამჯობინებენ, რადგან ამით მეტ შემოსავალს იღებენ. ამის შესახებ რეგიონის გუბერნატორმა გიორგი ღვინიაშვილმა განაცხადა.
კახეთის მასშტაბით რთველზე მოქმედ 34 ქარხანაში ერთ კილოგრამ თეთრ ყურძენს 30–35 თეთრად იბარებენ, რასაც სახელმწიფო სუბსიდია 15 თეთრი ემატება. ერთ კილოგრამ შავ ყურძენში კი ქარხნები 45 თეთრს იხდიან და გლეხი ამ თანხასთან ერთად 25 თეთრს სუბსიდიას იღებს. ამიტომ ღვინიაშვილის განცხადებით, გლეხები კილოგრამ თეთრ ყურძენს 70–80 თეთრად ჰყიდიან და შესაბამისად მოსავალს ქარხანაში აღარ აბარებენ. გლეხებმა ქარხნებში წელს საერთო ჯამში 12 ათასი ტონა შავი და 18 ათასი ტონა თეთრი ყურძენი ჩააბარეს. შეგახსენებთ, რომ წლევანდელ რთველზე სახელმწიფო სუბსიდია 8 მილიონი ლარით განისაზღვრა, თუმცა თანხის სრულად ათვისება აღნიშნული მიზეზის გამო ვერ განხორციელდა.
კახეთში რთველი პრაქტიკულად დასრულების სტადიაშია და დაგეგმილი 130–140 ათასი ტონის ნაცვლად ღვინიაშვილის განცხადებით 100 ათას ტონამდე ყურძენია მოკრეფილი, რისი მიზეზიც რეგიონში წლის განმავლობაშიც და უშუალოდ რთველის მიმდინარეობისასაც სეტყვა და უამინდობა გახდა.
რადიო ``კომერსანტი``