დღეს, 30 სექტემბერს, 17:00 საათზე, ეროვნული მუზეუმის აუდიტორიაში გაიმართება პრესკონფერენცია, რომელსაც ჩაატარებენ პროფესორი პიტერ მაკგოვერნი, საქართველოს ეროვნული მუზეუმის გენერალური დირექტორი დავით ლორთქიფანიძე და საქართველოს სავაჭრო-სამრეწველო პალატის პრეზიდენტი ჯემალ ინაიშვილი.
2008 წელს საქართველოს ეროვნული მუზეუმისა და საქართველოს სავაჭრო-სამრეწველო პალატის ინიციატივით დაფუძნდა "ღვინის ისტორიის ფონდი _ საქართველო ღვინის სამშობლო".
ფონდის მიზანია ღვინის ისტორიასთან დაკავშირებული კვლევების ხელშეწყობა, საქართველოს, როგორც უძველესი მეღვინეობის ქვეყნის წარმორჩენა. ქართული კულტურის, მათ შორის მეღვინეობის პოპულარიზაცია, ასევე ღვინის წარმოების და მოხმარების კულტურის ამაღლების ხელშეწყობა.
ღვინის ისტორიის ფონდის ეგიდით 29 სექტემბრიდან 3 ოქტომბრამდე საქართველოს ეწვევა პენსილვანიის უნივერსიტეტის პროფესორი ანთროპოლოგიაში პატრიკ მაკგოვერნი, რომელიც 30 სექტემბერს, 18.00 საათზე, საქართველოს ეროვნული მუზეუმის აუდიტორიაში წაიკითხავს ლექციას "ღვინო და ვაზი: ღვინის კულტურის არქეოლოგიური და ქიმიური კვლევა".
ღვინის ისტორიის ფონდი მომავალშიც შეუწყობს ხელს უცხოელი სპეციალისტების შეხვედრების ორგანიზებას ქართველ მკვლევარებთან, ასევე გეგმავს კონსულტაციებს ღვინის კომპანიებთან, ღვინის კონკურსების, კონფერენციების, სემინარებისა და დისკუსიების ორგანიზებას. გარდა ღვინის კულტურის პოლულარიზაციისა, ღვინის ისტორიის ფონდი მნიშვნელოვნად დაეხმარება მეცნიერულ კვლევებს, მათ შორის არქეოლოგიურ სამუშაოს.
"ჯი-ეიჩ-ენი"