ამერიკის შეერთებული შტატების მეორე საპრეზიდენტო ვადით არჩეული პრეზიდენტის, ბარაკ ობამას 21 იანვრისათვის დაგეგმილ ინაუგურაციას მთელი მსოფლიო დიდი ინტერესით ადევნებდა თვალს. თუმცა სამზადისს უხმაუროდ არ ჩაუვლია - საზეიმო ვახშმის მენიუმ ფრანგი მეღვინეები აღაშფოთა. საპრეზიდენტო წვეულებისათვის თითქოსდა შესაფერი მენიუ შეარჩიეს – ორთქლზე მოხარშული ასთაკვები, გრილზე შემწვარი ბიზონის ხორცი, ვაშლის ღვეზელი და... კალიფორნიული შამპანური Korbel. მენიუში სწორედ შამპანურად მოხსენიებულმა ამ სასმელმა დაუკარგა ფრანგებს მოსვენება. “შამპანურს მხოლოდ შამპანში ასხამენ,” – განაცხადა შამპანურის ამერიკული ბიუროს დირექტორმა სემ ჰეიტნერმა. მართლაც, შამპანურად მოიხსენიება მხოლოდ ის ცქრიალა ღვინო, რომელიც საფრანგეთში, შამპანში მზადდება. ალბათ, იფიქრებთ, ფრანგები ზღვარს გადავიდნენო, მაგრამ ევროპელები ხომ მეტად უფრთხილდებიან თავიანთ ტრადიციულ საკვებსა თუ სასმელს და მზად არიან სახელის დასაცავად ნებისმიერ ღონეს მიმართონ. ამის მაგალითია არა მხოლოდ შამპანური, არამედ იტალიური ყველი პარმეზანი (პარმიჯანო): ამ სახელით შეიძლება მოვიხსენიოთ მხოლოდ ის ყველი, რომელიც ჩრდილოეთ იტალიაში, პარმას, რეჯო-ემილიასა და მათ გარშემო პროვინციებში მზადდება. 2006 წელს აშშ-მა და ევროკავშირმა ხელი მოაწერეს შეთანხმებას, რომლის თანახმადაც ამერიკელ მწარმოებლებს აეკრძალათ თავიანთ შუშხუნა ღვინოებს “შამპანური” უწოდონ. თუმცა ეს აკრძალვა არ ვრცელდება Korbel-ის მსგავს კომპანიებზე, რომლებმაც თავიანთ ღვინოებს “შამპანური” 2006 წლამდე დაარქვეს.
© ღვინის კლუბი/Weekend