ყოფილი ყასაბი პასკალ მიშე, რომელიც კანადაში ბელგიიდან გადასახლდა, უკვე მესამე წელია პამიდვრისგან ამზადებს ღვინოს და მშვენიერი ბიზნესიც აქვს - ყოველწლიურად დაახლოებით 34 ათას ბოთლ პამიდვრის ღვინოს ყიდის. პასკალი პამიდვრის ღვინოს ბაბუის ბაბუისგან დანატოვარი რეცეპტით ამზადებს. მისი თქმით, პამიდვრის ღვინო წარმოების პროცესში იმავე სტადიებს გადის, რასაც ყურძნის ღვინო. მიშე პამიდვრისგან ორი ტიპის ღვინოს აყენებს - მშრალსა და ხავერდოვანს, რომელიც ტკბილ პინო დე შარანტსაც კი შეადარეს.თუმცა მეღვინეს მცირე იურიდიული პრობლემა აქვს - მისი სასმელი ღვინოდ რომ ჩაითვალოს, მან ხელისუფლება უნდა დაარწმუნოს, რომ პამიდორი ხილია (სხვათა შორის, ბოტანიკის თანახმად, პამიდორი სწორედ ხილის ერთ-ერთ სახესხვაობად ითვლება). პამიდვრის ღვინის დასამზადებლად დაახლოებით ცხრა თვეა საჭირო. მიღებულ სითხეში არაფერია ისეთი, რაც პამიდორს მოგაგონებთ - ზუსტად ისე გამოიყურება, როგორც გამჭვირვალე თეთრი ღვინო, 18-გრადუსიანი სიმაგრით. ჯერჯერობით პამიდვრის ღვინის შეძენა მხოლოდ კვებეკისა და მანიტობას მაღაზიებშია შესაძლებელი, თუმცა მიშე გაყიდვების გაფართოებას აშშ-ს, საფრანგეთის, გერმანიის, ლუქსემბურგისა და ნიდერლანდების მიმართულებითაც გეგმავს.
© ღვინის კლუბი/Weekend