ერთ-ერთმა ავსტრალიურმა ღვინომ საერთაშორისო ჯილდო არა იმდენად საგემოვნო თვისებების, რამდენადაც ფორმის, უფრო სწორად კი, წარმატებული მარკეტინგული იდეის ხორცშესხმისთვის დაიმსახურა. ღვინის საწარმო Laurance Wines მონაკოში გამართულ ღვინის შოუზე - Femmes et Vins du Monde Concours International დააჯილდოვეს. ეს კონკურსი ყოველწლიურად ტარდება და წარმოდგენილი სასმელები ამჯერად 28 ქალისგან შემდგარმა ჟიურიმ შეაფასა. ჟიურის იმდენად მოეწონა ავსტრალიის რეგიონის - Margaret River-ის ზვრებში მოყვანილი, დაიან ლორენსის ღვინო Icon-ის ბოთლის ფორმა, რომ მას პირველი პრიზი მიანიჭეს დიზაინისთვის. “ეს ძალიან სექსუალური ფორმის ბოთლია”, - აღნიშნა ჟიურის ერთ-ერთმა წევრმა ჯილდოს გადაცემისას. ბოთლის ეტიკეტზე გამოსახულია ის სამმეტრიანი ქანდაკება, რომელიც Laurance Wines-ის მარანთანაა აღმართული და რომელსაც ეწოდება “ჩიტივით თავისუფალი”. ბოთლის ფორმა თვითონ მის ლოურენსმა მოიფიქრა და, მართალია, ზოგიერთმა კრიტიკოსმა მას კეგლი და ლამპის სადგამი უწოდა, მაგრამ დიზაინი მაინც წარმატებული გამოდგა და მის გარშემო ატეხილი ხმაური ახალი ღვინისთვის წარმატების საფუძველიც აღმოჩნდა.
© ღვინის კლუბი/Weekend