საჭირო მასალა: გუფთებისთვის – 350 გ ხორცის ფარში, 3 ს.კ. შვრიის ფანტელი (ჰერკულესი), 2-3 ღერი მწვანე ხახვი, 1 ს.კ. კეტჩუპი, ძირა, მარილი, პილპილი – გემოვნებით. ღრუბლისთვის – 1 1/4 ჭიქა ფქვილი, 0,5 ჭიქა რძე, 2/3 ჭიქა მდუღარე წყალი, 2-3 კვერცხი, მწიკვი მარილი.
მომზადება: ხორცის ფარშში ავურიოთ ძირა, პილპილი და მარილი. მომზადებული ფარში 30 წუთით შევდგათ მაცივარში. შემდეგ შევურიოთ წვრილად დაჭრილი მწვანე ხახვი, შვრიის ფანტელი, კეტჩუპი. ფარში კარგად მოვზილოთ ხელით და 12 ბურთულად დავყოთ. ტარტალეტის ან სუფლეს პატარა ფორმებს ცოტა ცხიმი წავუსვათ და გუფთები შიგ მოვათავსოთ. შევდგათ 180 გრადუსზე გახურებულ ღუმელში 5-7 წუთით. ამასობაში მოვამზადოთ “ღრუბელი” – ფქვილი, კვერცხი, რძე, წყალი და მარილი კარგად ავთქვიფოთ. მივიღებთ თხელ ცომს. ღუმლიდან გამოვიღოთ გუფთები და ზედ დავასხათ ცომი, შემდეგ კვლავ შევაბრუნოთ ღუმელში და ვაცხოთ 25 წუთის განმავლობაში.
© ღვინის კლუბი/Weekend