12 წლის დევიდ პაინსმა (David Pines) ნიუ-იორკიდან შეადგინა მსოფლიოში პირველი, ნიუ-იორკის საბავშვო კაფეების გზამკვლევი. დევიდის აზრით, აქამდე გამოცემული გზამკვლევები მხოლოდ უფროსებისთვის იყო განკუთვნილი და მათში ყურადღებას “უცნაურ რამეებს” აქცევდნენ: ინტერიერის დიზაინს, ჭურჭელს, განათებას, მიმტანების ზრდილობას და ა.შ. ბავშვებისთვის კი ეს ყველაფერი უმნიშვნელოა, ამიტომაც დევიდის გზამკვლევში - A Kid's Guide to the Best Things to Eat and Drink in New York City - ნიუ-იორკის ყველაზე გემრიელი და საინტერესო კერძები მოხვდა. წიგნში აღწერილია ნიუიორკული სამზარეულოს 100 ტიპური კერძი და მითითებულია ისიც, თუ სად შეიძლება მათი გასინჯვა. როგორც აღმოჩნდა, თვითონ ავტორის საყვარელი რესტორანი არის Chinatown Brasserie. დევიდ პაინსი აქტიურად უარყოფს ბრალდებებს იმის შესახებ, რომ გზამკვლევის შედგენაში მას მშობლები ეხმარებოდნენ. მისი თქმით, მშობლებს ის მხოლოდ კაფეებსა და რესტორნებში დაჰყავდათ და ახალი კერძების დაგემოვნებაში უწყობდნენ ხელს.
© ღვინის კლუბი/Weekend