რამდენიმე დღის წინ გამოძიების ფედერალურმა ბიურომ ლოს-ანჟელესში ფრანგული ღვინოებით მოვაჭრე და მილიონერი რუდი კურნიავანი დააპატიმრა. მას თაღლითობაში ედება ბრალი - კურნიავანი იაფფასიანი ღვინის ელიტურ ღვინოდ გასაღებას ცდილობდა. რომ დასცლოდა და ეს გარიგება ბოლომდე მიეყვანა, კურნიავანი 1,3 მილიონი დოლარის მოგებას ნახავდა. გამოძიების მასალების თანახმად, 2008 წელს კურნიავინმა აუქციონზე 84 ბოთლი ბურგუნდიული ღვინო Domaine Ponsot გაიტანა, რაც საერთო ჯამში 600 000 დოლარად ჰქონდა შეფასებული, თუმცა სინამდვილეში გაცილებით ნაკლები ღირდა. ბიზნესმენი ასევე ცდილობდა გაეყიდა 1929 წლით დათარიღებული ერთი ბოთლი Domaine Ponsot, მაგრამ კოვზი ნაცარში ჩაუვარდა - ამ ღვინის ბოთლებში ჩამოსხმა მხოლოდ 1934 წელს დაიწყეს. ვენახ Clos St. Denis-ის ღვინოების ჩამოსხმის წლებად კურნიავანს 1945-71 წლები ჰქონდა მითითებული, თუმცა ამ ღვინის ჩამოსხმა 1982 წელს დაიწყეს. როდესაც ეს ფაქტები გამოაშკარავდა, აუქციონის სახლ Acker Merrall and Condit-ის მესვეურებმა ღვინოები აუქციონიდან მოხსნეს. კურნიავანს ასევე ადანაშაულებენ კრედიტების თაღლითური სქემით მიღებაში.
© ღვინის კლუბი/Weekend