სატრაპეზო-ბრუტი ქართული სავაჭრო ნიშნით გამოშვებული ფრანგული პროდუქტია. ტრადიციული ბოთლური მეთოდით დაყენებული ეს ცქრიალა ღვინო ძალიან კარგი გარეგნობით ხასიათდება, სადაც ოქროსფერი ლიმნისფერში გადადის. ღვინო ზომიერად ხანგრძლივი ცქრიალით ხასიათდება, სურნელებში კი პირველ რიგში ტკბილი ტონები ჩნდება – ნამცხვარი, მასკარპონე. გვხვდება მცენარეული კვალიც, უფრო ხმელი ყვავილების. ორი-სამი წლის წინ ღვინო უფრო ხალისიანი და ჰაეროვანი იქნებოდა. მან უკვე გადაიარა თავისი პიკი და კარგი იქნება, თუკი დროზე მოიხმართ. როგორც სხვა ტრადიციული მეთოდით დამზადებული ცქრიალა ღვინოები, ეს ბრუტიც აპერიტივისთვისაა მისწრება, ამავე დროს, კარგი მისაყოლებელი იქნება ხიზილალასთან, გამოყვანილ თევზთან.
© ღვინის კლუბი/Weekend